سەرۆککۆمار سەرپەرشتی کۆبوونەوەیەک لەبارەی دۆسیەی ئاو لە عیراق دەکات

PUKMEDIA

کۆبوونەوەیەک تایبەت بە دۆسیەی ئاو بە سەرپەرشتی سەرۆککۆمار

سەرۆککۆماری عیراق رایدەگەیەنێت، "پێویستە لەگەڵ وڵاتانی دراوسێ پێکەوە زیانەکانی گۆڕانکاری کەشوھەوا بگرنەئەستۆ".

د.لەتیف رەشید، سەرۆککۆماری عیراق لە بەغدا سەرپەرشتی کۆبوونەوەیەکی فراوانیکرد, تایبەت بە دۆسیەی ئاو و جەختیکردەوە، لە گرنگی کۆنفرانسی ئاو، کە لە نیویۆرک بەڕێوەدەچێت و وتی: "پێویستە ھەنگاوی جددی و پراکتیکی بنرێت بۆ گەیشتن بە رێککەوتن لەگەڵ وڵاتانی دراوسێ، بە مەبەستی پێکەوە گرتنەئەستۆی زیانەکانی گۆڕانکاری کەشوھەوا و دابینکردنی پشکێکی دادپەروەرانەی ئاو بۆ عیراق".

سەرۆککۆماری عیراق ئاماژەی بەوەشکرد: "پێویستە رێکاری کاریگەر بۆ جێبەجێکردنی یاسای پێویست دیاری بکرێت، کە ئاو و ئاسایشی کشتوکاڵی لە عیراق بپارێزێت، بۆ ئەو مەبەستەش لەگەڵ وڵاتانی دراوسێ گفتوگۆ بکرێت، چونکە یەکێکە لەو وڵاتانەی بەھۆی گۆڕانکارییەکانی کەشوھەواوە زۆرترین زیانی بەرکەوتووە".

وەزیری سەرچاوەکانی ئاویش رایگەیاند: "دیدارێکیاندا لەگەڵ وەزیری وزەی ئێران لەبارەی ئاڵوگۆڕی زانیاری و دانانی وێستگەی پێوانە لەسەر رووبارە سنوورییەکان، گەیشتونەتە لێکتێگەیشتن".

ئامادەبووانی کۆبونەوەکەش جەختیانکردەوە، لە گرنگی بەشداریکردنی سەرۆککۆمار لە کۆنفرانسی ئاو و بەردەوامی گەشەپێدان، کە بڕیارە مانگی داھاتوو لە نیویۆرک بەڕێوەبچێت".
PUKMEDIA