لەسەر بڕیاری سەرۆک بافڵ هەڵمەتی رواندنی یەک ملیۆن نەمام بەردەوامە

تایبەت

دارستانی رازیانە لە پارێزگای سلێمانی

لەسەر بڕیار و راسپاردەى بافڵ جەلال تاڵەبانی سەرۆکی یەکێتیی نیشتمانیی کوردستان هەنگاوەکانی رواندنی نەمام و سەوزکردنی کوردستان چڕتر دەکرێتەوە بۆ بەدیهێنانی ئامانجە ژینگەییەکان و پاراستنی دارستانەکان، بۆ ئەو مەبەستە و لەپرۆژەی پارکی دارستانی رازیانە لەپارێزگای سلێمانی دەست بەئامادەکارییەکان کرا بۆ رواندنی نەمام. 

لەبارەی ئەم قۆناغەشەوە، هاوکار جەلال بەرێوەبەرى دارستان و پاوانی سلێمانی بە سایتی رەسمی یەکیتیی نیشتمانیی کوردستان PUKMEDIA ی رایگەیاند:" لەچەند مانگی رابردوو هەڵمەتەکەمان لەشەش پرۆژەدا بەڕێوەبرد و ئێستاش دوای ڕەوینەوەی ئەو شەپۆلە سەرما و سۆڵەیەی سنوری پارێزگاکەمانی گرتبۆوە دەستمان کردەوە بەکارەکانی هەڵمەتەکە لەنێو سنوری چالاکی بەڕێوەبەرایەتیماندا بۆ ئەو مەبەستە ئێستا لە پرۆژەی دارستانی خدران و پارکی رازیانە و لەرۆژانی داهاتوشدا لەچەندین پرۆژەی دارستانیدا دەست بە نەمام ڕواندن دەکەین". 

 هەر لەوبارەیەوە قادر محمد حسێن لێپرسراوی پرۆژەى پارکی دارستانی رازیانە بۆ PUKMEDIA وتی:" ئەمڕۆ دەستمانکرد بەئامادەکارییە پێویستەکان لەدروستکردنی هێڵی گرادۆنی و لێدانی چاڵ و دانانی سیستمی ئاودێری بۆ ئەو بەشەی پرۆژەکەمان کەپێویستی بەسەوزکردنە و لەسەر راسپاردەی سەرۆک بافڵ نەمامی پێویستی بۆ دابین دەکرێت". 

#ئاشتکردنەوەى_سلێمانی

PUKMEDIA