قوباد تاڵەبانی و گۆتێرێس: کێشەکانی هەرێم و بەغدا لە بنەڕەتەوە چارەسەر بکرێن

PUKMEDIA

قوباد تاڵەبانی، جێگری سەرۆک وەزیران و ئەنتۆنیۆ گۆتێرێس، سکرتێری گشتیی نەتەوە یەکگرتووەکان

قوباد تاڵەبانی، جێگری سەرۆک وەزیران، لەگەڵ ئەنتۆنیۆ گۆتێرێس، سکرتێری گشتیی نەتەوە یەکگرتووەکان کۆبوویەوەو تاوتوێی دواپێشهات و گۆڕانکارییە سیاسییەکانیان کرد.

لەکۆبوونەوەکەدا کە ئەمڕۆ ٢ی ٣ لەهەولێر بەڕێوەچوو، جێنین پلاسخارت نوێنەری تایبەتی سکرتێری گشتی نەتەوە یەکگرتووەکان و دابان شەدەڵە جێگری سەرۆکی فەرمانگەی پەیوەندییەکانی دەرەوە ئامادەی بوون، تیشک خرایە سەر کێشەکانی ناوخۆی هەرێم و عیراق و جەخت لە چارەسەرکردنییان لەڕێی دیالۆگەوە کرایەوە.

لەسەرەتای کۆبوونەوەکەدا، بەڕێز گۆتێرێس باسی رۆڵ و گرنگی سەرۆک مام جەلالی کرد و وتی؛ وەک هاوڕێیەکی دێرینی سەرۆک مام جەلال و دۆستی ئێوە، داوای وەلانانی کێشەکان و چارەسەر کردنی گرفتەکانی ناوخۆی هەرێمی کوردستان دەکەم لەپێناو پاراستنی بەرژەوەندییەکانی هاوڵاتیانی هەرێمی کوردستان.

دواتر باسی رەوشی عیراق و کێشەکانی نێوان هەولێر و بەغداد کرا. جەخت کرایەوە کە؛ پێویستە لەسەر بنەمای لێکتێگەیشتن و لەپێناو بەرژەوەندی گەلانی عیراق بەشێوەیەکی بنەڕەتی کێشەکان چارەسەر بکرێن.

قوباد تاڵەبانی بەوردی گرفت و کێشە سیاسییەکانی هەرێمی کوردستانی بۆ روونکردەوە و دیدی خۆی لەبارەی چۆنییەتی چارەسەرکردنی ئەو کێشانە خستەڕوو. لەکۆتاییشدا، سوپاسی هاتنی بەڕێز گۆتێرێزی کرد و هەوڵ و پەرۆشی لەپێناو یەکڕیزی گەلی کورد و عێراق بەرز نرخاند.
PUKMEDIA