خاتوو شاناز: خزمه‌تی زیاتری سلێمانی ده‌كه‌ین

ئاژانسەکان

کردنەوەی دەروازه‌ی شه‌قامی مه‌وله‌وی

له‌ساڵیادی راپه‌ڕینی شاری سلێمانیدا مه‌ڵبه‌ندی (١) ی رێكخستنی سلێمانی یه‌كێتی، چه‌ند چالاكییه‌ك ئه‌نجامده‌دات، له‌و چوارچێوه‌یه‌شدا له‌مه‌راسیمێكدا ده‌روازه‌ی شه‌قامی مه‌وله‌وی كه‌له‌سه‌ر ئه‌ركی خاتوو شاناز ئیبراهیم ئه‌حمه‌د نوێكرابوه‌وه‌ له‌لایه‌ن كاسبكارانه‌وه‌ كرایه‌وه‌و خاتوو شاناز ئیبراهیم ئه‌حمه‌د-یش  رایده‌گه‌یه‌نێت:" ئومێدمان هه‌یه‌ ده‌ستكه‌وتی زیاتری راپه‌ڕین به‌دی بهێنین و خزمه‌تی زیاتری سلێمانی بكه‌ین".

خاتوو شاناز ئیبراهیم ئه‌حمه‌د خانمی یه‌كه‌می عیراق رایگه‌یاند:" نوێكردنه‌وه‌ی ده‌روازه‌ی شه‌قامی مه‌وله‌وی نیشانه‌ی ژیاننه‌وه‌ی ئه‌م شاره‌یه‌ به‌تایبه‌ت له‌م رۆژه‌دا كه‌ رۆژی راپه‌ڕینی شاری هه‌ڵمه‌ت و قوربانیه‌".
" ئه‌م پرۆژه‌یه‌ سه‌ره‌تاو كۆتایی پرۆژه‌كانمان نابێت له‌پارێزگای سلێمانی و پرۆژه‌كان به‌رده‌وام ده‌بن و ئومێدمان هه‌یه‌ ده‌ستكه‌وتی زیاتری راپه‌ڕین به‌دی بهێنێن و خزمه‌تی سلێمانی بكه‌ین و به‌گیان و رۆحمان پارێزگاری له‌ ده‌ستكه‌وته‌كانی راپه‌ڕین بكه‌ین" خاتوو شاناز وایوت.

له‌مه‌راسیمه‌كه‌دا د.هه‌ڤاڵ ئه‌بوبه‌كر پارێزگاری سلێمانی وته‌یه‌كی پێشكه‌شكردو رایگه‌یاند:" پێویسته‌ سوپاسی خانمی یه‌كه‌می عیراق بكه‌ین كه‌له‌سه‌ر رێچكه‌ی خاتوو هێرۆ ئیبراهیم ئه‌حمه‌د، كه‌پاراستنی په‌روه‌رده‌و كلتورو ئابوورییه‌كی سه‌وزی كردووه‌ته‌ ئه‌جێندای كاره‌كانی".

" ئه‌و ئابووریه‌ چه‌ته‌گه‌رییه‌ی كه‌ ماوه‌یه‌كی زۆره‌ جه‌سته‌ی ئه‌م وڵاته‌ی شه‌كه‌ت كردووه‌ بێزاری كردوین، ئه‌مڕۆ هه‌موومان له‌ دەروازه‌ی شه‌قامی مه‌وله‌وین و له‌م رۆژه‌ پیرۆزه‌دا به‌شدارین له‌كردنه‌وه‌ی ده‌روازه‌ نۆژه‌نكراوه‌كه‌". د.هه‌ڤاڵ ئه‌بوبه‌كر وایوت.

مه‌راسیمه‌كه‌ به‌ ئاماده‌بوونی خاتوو شاناز ئیبراهیم ئه‌حمه‌د خانمی یه‌كه‌می عیراق و د.هه‌ڤاڵ ئه‌بوبه‌كر پارێزگاری سلێمانی و جه‌زای سه‌ید مه‌جید لێپرسراوی مه‌ڵبه‌ندی (١) ی رێكخستنی سلێمانی و ژماره‌یه‌ك كه‌سایه‌تی حكومی و حزبی و هاووڵاتیانی شاری سلێمانی، ده‌روازه‌ی شه‌قامی مه‌وله‌وی دوای نوێكردنه‌وه‌ كرایه‌وه‌.

هه‌ر له‌چوارچێوه‌ی چالاكییه‌كانی مه‌ڵبه‌ندی (١) ی رێكخستنی سلێمانی یه‌كێتیی نیشتمانیی كوردستاندا، ئه‌مڕۆ تاجه‌گوڵینه‌ی رێز و وه‌فا له‌به‌رده‌م په‌یكه‌ری ٧ی ئازار له‌پاركی مه‌لیك مه‌حمود به‌ئاماده‌بوونی خاتوو شاناز ئیبراهیم ئه‌حمه‌د خانمی یه‌كه‌می عیراق و جه‌زای سه‌ید مه‌جید لێپرسراوی مه‌ڵبه‌ندی (١) ی رێكخستنی سلێمانی داده‌نرێت.

هاوكات هه‌ر ئه‌مڕۆ باخچه‌یه‌ك له‌سلێمانی به‌ناوی (مفه‌وه‌ز كه‌مال شا) كه‌له‌كاتی راپه‌ڕیندا شه‌هید بووه‌ ده‌كرێته‌وه‌، دواتر له‌ سه‌عات ٣:٠٠ی پاشنیوه‌ڕۆ بۆ به‌رزڕاگرتنی یادی راپه‌ڕینی سلێمانی له‌ناو مه‌ڵبه‌ندی سلێمانی پێشوازی له‌ئه‌ندامانی مه‌كته‌بی سیاسی و سه‌ركردایه‌تی و سه‌رجه‌م چین و توێژه‌كانی شاری هه‌ڵمه‌ت و قوربانی ده‌كرێت.

PUKMEDIA