یه‌كێتی و پارتی بۆ پرسی هه‌ڵبژاردن كۆده‌بنه‌وه‌

PUKMEDIA

یه‌كێتی و پارتی بۆ پرسی هه‌ڵبژاردن كۆده‌بنه‌وه‌

جارێكی دیكه‌ ده‌زگای هه‌ڵبژاردنی یه‌كێتیی نیشتمانیی كوردستان و مه‌كته‌بی هه‌ڵبژاردنی پارتی دیموكراتی كوردستان له‌باره‌ی هه‌ڵبژاردنه‌وه‌ كۆبوونه‌وه‌.

له‌باره‌ی كۆبوونه‌وه‌كه‌وه‌ د. مه‌جید حه‌مه‌د ئه‌مین لێپسراوی مه‌ڵبه‌ندی 3 ڕێكخستنی هه‌ولێر به‌ PUKMEDIA ی ڕایگه‌یاند:" كێشه‌كانی نێوان یه‌كێتی و پارتی ته‌نها هه‌ڵبژاردن نیه‌، به‌ڵكو كێشه‌كانی یه‌كێتی له‌گه‌ڵ پارتی له‌سه‌ر مه‌له‌فی بژێوه‌ی خه‌ڵك و ئیداره‌دانی حكومه‌ت و مه‌له‌فی نه‌وت و دارایی، هه‌روه‌ها ده‌ستوه‌ردانی ئه‌منی و كۆمه‌ڵێك كێشه‌ی دیكه‌ هه‌ن، ده‌بێت رێكه‌وتنیان له‌سه‌ر بكرێن و چاره‌سه‌ربكرێن .

دوای ده‌ستپێشخه‌ریه‌كه‌ی سه‌رۆك بافڵ، ئه‌مه‌ بۆ دووه‌مجاره‌ یه‌كێتیی نیشتمانیی كوردستان و پارتی دیموكراتی كوردستان له‌سه‌ر پرسی هه‌ڵبژاردن كۆببنه‌وه‌، له‌كۆبوونه‌وه‌ی یه‌كه‌میاندا له‌سه‌ر چوار خاڵ رێككه‌وتن كه‌ خۆی له‌هه‌ڵبژاردنی هه‌رێمی كوردستان به‌چوار بازنه‌یی، داتای حكومه‌تی فیدراڵ بۆ بازنه‌كانی هه‌ڵبژاردن به‌كاربهێنرێت، هه‌ڵبژاردن نیوه‌ به‌ لیستی كراوه‌، نیوه‌ به‌ لیستی داخراو ئه‌نجام بدرێت، ژماره‌ی كورسی بازنه‌كان له‌سه‌ر بنه‌مای ئاماری وه‌زاره‌تی بازرگانی عیراق بێت، ده‌بینێته‌وه‌.

له‌تیف نێروه‌یی لێپرسراوی بۆردی هه‌ماهه‌نگی و به‌دواداچوون له‌ ده‌زگای هه‌ڵبژاردن به‌ سایتی ره‌سمی یه‌كێتیی نیشتمانیی كوردستان PUKMEDIA ی راگه‌یاند:" كۆبوونه‌وه‌ی ئه‌مڕۆی ده‌زگای هه‌ڵبژاردنی یه‌كێتی و مه‌كته‌بی هه‌ڵبژاردنی پارتی ته‌واوكه‌ری كۆبوونه‌وه‌ی رابردووه‌"

ده‌شڵێت:" زامنكردنی مافی پێكهاته‌كان یه‌كێكیتره‌ له‌و خاڵانه‌ی كه‌هه‌ردوولا هاوده‌نگن له‌سه‌ری، به‌ڵام تێڕوانینی جیاواز هه‌یه‌ له‌سه‌ر كورسی كۆتاكان ".

 پێشتر رۆژی 28-2-202 ده‌زگای هه‌ڵبژاردنی یه‌كێتیی نیشتمانیی كوردستان و مه‌كته‌بی هه‌ڵبژاردنی پارتی دیموكراتی كوردستان له‌هه‌ولێر له‌باره‌ی هه‌ڵبژاردنه‌وه‌ كۆبوونه‌وه‌.


PUKMEDIA