خاتوو گه‌لاوێژ بۆ ژنان: ئه‌ركی ئه‌مڕۆتان قورس و زه‌حمه‌ته‌

PUKMEDIA

8ی مارس

خاتوو گه‌لاوێژ به‌بۆنه‌ی رۆژی جیهانی ژنانه‌وه‌ په‌یامێك بڵاوده‌كاته‌وه‌و ئاماژه‌ بۆ ئه‌وه‌ده‌كات:" ژنی كورد له‌ خه‌باتی ڕزگاریخوازیی نه‌ته‌وه‌كه‌یدا شانبه‌شانی پیاوان له‌ سه‌نگه‌ری به‌رگری و پاراستنی به‌هابه‌رزه‌كانی كورده‌واریدا بووه‌".

ده‌قی په‌یامه‌كه‌ی..
به‌بۆنه‌ی 8ی مارس، ڕۆژی جیهانیی ژنانه‌وه‌، گه‌رمترین پیرۆزبایی له‌سه‌رجه‌م ژنانی جیهان به‌گشتی و ژنانی كوردستان به‌تایبه‌تی ده‌كه‌م و به‌تایبه‌تتریش دایك و هاوسه‌ر و كچانی شه‌هیدانی گه‌ل و نیشتیمانه‌كه‌م.

ئه‌م ڕۆژه‌ سه‌لماندنی ئه‌و جه‌قیقه‌ته‌یه‌ كه‌ ژنان سه‌نگ و قورسایی و ڕۆڵی سه‌ره‌كییان هه‌بووه‌ و هه‌یه‌ و ده‌بێت له‌ پێشخستنی ژیان و په‌ره‌پێدانی هه‌موو كایه‌ و بواره‌كان له‌ سه‌رانسه‌ری جیهاندا، ئه‌وه‌ خه‌باتی ژنان بوو كه‌ ئه‌م ڕۆژه‌ی كرده‌ بۆنه‌یه‌كی جیهانی و ساڵانه‌یش ژنانی كورد به‌سه‌ربه‌رزییه‌وه‌ یادی ده‌كه‌نه‌وه‌.

ژنانی كورد هه‌ر له‌دێر زه‌مانه‌وه‌ رۆڵی به‌رچاویان هه‌بووه‌و ئه‌مه‌ی ئێستایش درێژه‌پێده‌ری ئه‌و ڕۆڵ و پێشڕه‌وایه‌تییه‌یه‌ كه‌ داپیره‌ مه‌زنه‌كانمان گێڕاویانه‌ و ناویان به‌ پیتی زێڕین له‌ مێژووماندا تۆماركراوه‌.

ژنی كورد له‌ خه‌باتی ڕزگاریخوازیی نه‌ته‌وه‌كه‌یدا شانبه‌شانی پیاوان له‌ سه‌نگه‌ری به‌رگری و پاراستنی به‌هابه‌رزه‌كانی كورده‌واریدا بووه‌ و به‌ چه‌ك و بیر و په‌روه‌رده‌ و پێگه‌یاندن تێكۆشاوه‌.
ژماره‌ی ئه‌و ژنه‌ تێكۆشه‌رانه‌ كه‌م نین كه‌ له‌ سه‌نگه‌ره‌كانی پێشمه‌رگایه‌تیدا خوێنی گه‌شیان ڕژاوه‌ و بووه‌ته‌ گوڵاڵه‌سووره‌ی نیشتیمانه‌كه‌مان بۆیه‌ له‌مڕۆژه‌دا پێش هه‌موو كه‌س ده‌ستی گه‌وره‌یی و میهره‌بانیی بۆ ئه‌وان به‌ سنگه‌وه‌ ده‌گرین.
ئێستا خه‌باتی ژنان به‌تایبه‌ت له‌م به‌شه‌ی نیشتیماندا گۆڕاوه‌ بۆ خه‌باتی مه‌ده‌نی و ئه‌ركی ئیداری و پێشخستنی به‌ها به‌رزه‌ كۆمه‌ڵایه‌تییه‌كانی كورده‌واری كه‌ چاكی مه‌ردانه‌یان لێكردووه‌ به‌لادا و هیچ بوارێكی سیاسی و ڕێكخراوه‌یی و ئیداری و په‌روه‌رده‌یی و حكومیی نابینین كه‌ ده‌یان و سه‌دان ژنی ڕووسووری كورد گه‌وره‌یی خۆیی تێدا نه‌سه‌لماندبێت.

ئێوه‌ كچان و ژنانی میهره‌بان و ڕووسوور و سه‌نگین و سه‌لاری كۆمه‌ڵی كورده‌واری، ئه‌ركی ئه‌مڕۆتان یه‌كجار قورس و زه‌حمه‌ته‌، به‌ڵام دڵنیاین شانی به‌شكۆی ئێوه‌و خۆڕاگریی و دڵنه‌رمی و سۆز و وه‌فاداریتان هه‌موو ئه‌ركێكتان به‌لاوه‌ ئاسان ده‌كات و سه‌ربه‌رزانه‌ هه‌ر یه‌كه‌تان له‌ بواری خۆیدا درێژه‌ به‌ خه‌باتی ژنانه‌ی خۆتان ده‌ده‌ن.

سڵاو بۆ ته‌واره‌ شه‌هیده‌كان.. سڵاو بۆ ئه‌و دایكه‌ میهره‌بانانه‌ی كچ و كوڕی خۆیان به‌ بیری پێشكه‌وتووخوازیی په‌روه‌رده‌ ده‌كه‌ن.. سڵاو بۆ ژنانی جیهان.

گه‌لاوێژ

PUKMEDIA