قوباد تاڵەبانی: ئامانجمانە كورسی پێكهاتەكان نوێنەرایەتی راستەقینەی خۆیانبن

نووسینگەی قوباد تاڵەبانی

كۆبوونەوەی قوباد تاڵەبانی لەگەڵ باڵیۆزی ئیتاڵیا لە عیراق

قوباد تاڵەبانی جێگری سەرۆك وەزیرانی هەرێم پێشوازی لە ماوریزیۆ گریگانتی باڵیۆزی ئیتاڵیا لە عیراق كرد و لەكۆبوونەوەی نێوانیاندا چەند پرسێك لەوانە پەیوەندییەكانی نێوان هەولێر و بەغدا و هەڵبژاردنەكانی داهاتووی پەرلەمانی كوردستان تاوتوێ كران.

لە كۆبوونەوەكەدا كە رۆژی 8 مارسی 2023 لە هەولێر بەڕێوەچوو، قوباد تاڵەبانی پشتگیری خۆی بۆ حكومەتی عیراق بە سەرۆكایەتی بەڕێز سودانی دووپات كردەوە و هیوای خواست هەردوو حكومەتی هەولێر و بەغدا لە ماوەیەكی نزیكدا بتوانن لەسەر پرسی یاسای نەوت و گاز رێككەوتن بكەن.

جێگری سەرۆك وەزیران لەمبارەیەوە راشیگەیاند: "عیراق وڵاتێكە لەسەر داهاتی نەوت بەڕێوەدەچێت، هەربۆیە هەتا هەولێر و بەغدا نەتوانن كێشەی نەوت و گاز چارەسەر بكەن، كێشە هەڵپەسێردراوەكانیتر بە ئاسانی چارەسەر ناكرێن. 
ئاماژەی بەوەشدا: "كاتی ئەوە هاتووە كە چیتر كات بە فیڕۆ نەدرێت گفتوگۆكان چڕبكرێنەوە بۆ رێككەوتن لەسەر یاسای نەوت و گاز و چۆنییەتی بەڕێوەبردن و فرۆشتنی نەوت، چونكە دواكەوتنی رێككەوتن لە بەرژەوەندی خەڵكی عیراق و كوردستاندا نییە".

لە تەوەرێكیتری كۆبوونەوەكەدا باس لە پرسی هەڵبژاردنەكانی داهاتووی پەرلەمانی كوردستان كرا، قوباد تاڵەبانی رایگەیاند: "ئامادەی ئەنجامدانی هەڵبژاردنن و لە ئێستادا كۆبوونەوەكان بۆ رێككەوتن لەسەر یاسای هەڵبژاردنەكان دەستی پێ كردوەتەوە. وتیشی لێكتێگەیشتنی باش دروست بووە و ئەوەی ماوەتەوە بابەتی كورسی كۆتاكانە كە دیدی ئێمە بۆ كورسی كۆتاكان ڕوونە و ئامانجمانە كورسی كۆتاكان بۆ نوێنەرایەتیی راستەقینەی كەمایەتییەكانی كوردستان بێت".

PUKMEDIA