قوباد تاڵەبانی بۆ وەفدی پەرلەمانی ئەوروپا: کاتی حوکمڕانی باشە

نووسینگەی قوباد تاڵەبانی

كۆبوونەوەی قوباد تاڵەبانی لەگەڵ وەفدی پەرلەمانی ئەوروپا

قوباد تاڵەبانی جێگری سەرۆك وەزیرانی هەرێمی كوردستان پێشوازی له‌ وەفدێكى په‌رله‌مانتارانی پەرلەمانی ئه‌وروپا به‌ ‏سه‌رۆكايه‌تيى سارا سكيتێدال كرد و پێكەوە تاوتوێی كۆمەڵێك پرسی جێگە بایەخی هاوبەشی هەردوولایان كرد.

لە كۆبوونەوەكەدا لە شاری هەولێر (8ی ئازاری 2023) وەفدی میوان جەختیان لە بەهێزكردنی كوردستان كردەوە لە چوارچێوەی عێراقێكی بەهێزی فیدراڵدا و ئەوەیان خستەڕوو دەخوازن پەیوەندی پتەوی راستەوخۆیان لەگەڵ هەرێمی كوردستاندا هەبێت، هەروەها ئەوەشیان بیر هێنایەوە كە سەرجەم دەسكەوتە زێڕینەكانی كوردستان لە کاتی یەكگرتوویی و تەبایی هێزە سیاسییەكانی كوردستان بەدیهاتوون.

لای خۆشییەوە قوباد تاڵەبانی ڕوونی كردەوە، تەحەداكانی قۆناغی ئێستا خزمەتگوزاری و باشتركردنی ژیانی خەڵكن و "كات كاتی حوكمڕانی باشە". هەروەها باسی لەوەكرد "جێگەی داخە لە ئێستادا لە كوردستان یەكڕیز و یەكگرتوو نین، ئەمەش هۆكاری لاوازییە لە بەغدا".

قوباد تاڵەبانی باسی لەوەش كرد کە پێویستە سەرجەم هەوڵ و كۆششەكان بۆ مسۆگەركردنی شایستە داراییەكانی هەرێمی كوردستان بێت لە بودجەی گشتی فیدراڵی لەگەڵ چارەسەركردنی كێشە كەڵەكەبووەكانی پرسی نەوت و گاز.

هەردوولا هاوڕابوون لەبارەی گرنگی ئەنجامدانی هەڵبژاردنێكی پاك و بێگەرد تا ببێتە بنەمایەك بۆ نوێنەرایەتییەكی راستەقینە لە پەرلەمان و حكومەتی داهاتوو لە هەرێمی كوردستان.

PUKMEDIA