پێنجەمین فێستیڤاڵی بەهارە بۆ داشکاندنی نرخەکان لەسلێمانی دەکرێتەوە

ژووری بازرگانی سلێمانی

پێنجەمین فێستیڤاڵی بەهارە

لەپێناو دەستکەوتنی خواردەمەنی و پێداویستی رۆژانە و ئامادەکاری بۆ هاتنی مانگی پیرۆزی رەمەزان، پێنجەمین فێستیڤاڵی بەهارە لەپێشانگای نێودەوڵەتی سلێمانی کرایەوە.

هاووڵاتیان خواردەمەنی و پێداویستییەکانیان بە نرخێکی هەرزان دەستبکەوێت

لەبارەی پێشانگاکەوە سیروان محەمەد لێپرسراوی ژوری بازرگانی سلێمانی بەسایتی رەسمیی یەکێتیی نیشتمانیی کوردستان PUKMEDIAی راگەیاند:" هەموو ساڵێک پێش هاتنی مانگی رەمەزانی پیرۆز ئەم فێستیڤاڵە دەکەینەوە کە ئامانجمان لێی ئەوەیە هاووڵاتیان خواردەمەنی و پێداویستییەکانیان بە نرخێکی هەرزان و گونجاوتر لە بازاڕەکان بۆ ئەو مانگە پیرۆزە دەستبکەوێت".

"لە فێستیڤاڵەکە چەندین کۆمپانیای دەرەکی و ناوخۆیی بەشدارن و بڕیارە لەئەمڕۆوە ٩-٣-٢٠٢٣ بۆ ماوەی ١٠ رۆژ بەردەوام بێت." سیروان محەمەد وایوت

چەندین کۆمپانیای بیانی و ناوخۆیی تێیدا بەشدارن

هاوکات حەسەن رەحیم سەرپەرشتیاری پێشانگای نێودەوڵەتی سلێمانی لەکاتی کردنەوەی پێشەنگاکەدا رایگەیاند:"ئەم فیستیڤاڵە لەبارودۆخێکدا بەڕێوەدەچێت کە بازاڕەکان پێویستیان بە جوڵاندن هەیە و هاووڵاتیانیش دەتوانن بە نرخێکی هەرزان و گونجاوتر پێداویستییەکانیان بەدەستبهێنن".

راشیگەیاند:"فیستیڤاڵی بەھارە یەکەمین فیستیڤاڵی نێودەوڵەتییە لەسەر ئاستی عیراق، کە چەندین کۆمپانیای بیانی و ناوخۆیی تێیدا بەشدارن".

ئاماژەی بەوەشدا:" ئەم فێستیڤاڵە لەلایەن حکومەتی ناوەندی عیراقەوە گرنگی تایبەتی پێدەدرێت و بە رەسمی ناسێنراوە و نوێنەری حکومەتی عیراق لە فیستیڤاڵەکەدا بەشدار دەبێت، هاوکات سوپاسی سەرجەم فەرمانگەکانی حکومەتی ھەرێم دەکەین کە ھاوکارییان کردوین لە ڕووی ئەمنیشەوە سەرجەم ڕێکارەکان گیراونەتەبەر و ئامادەکاری تەواو کراوە بۆ چارەسەرکردنی ھەر رووداوێکی نەخوازراو".

فیستیڤاڵی بەھارە لەکاتێکدا سازدەکرێت کە نزیکە لە جەژنی نەورۆز و مانگی رەمەزانی پیرۆز، لە ساڵانی رابردوودا ١٥ ھەزار ھاووڵاتی بەشدارییان لە ڤێستیڤاڵەکەدا کردووەو چاوەڕواندەکرێت ئەمساڵ ھاووڵاتی زیاتر بەشداربن.

PUKMEDIA