یەكێتی پێنجوێن و رازیانەش سەوز دەكات

PUKMEDIA

لەسەر راسپاردەی سەرۆکی یەکێتی پێنجوێن و رازیانە سەوز دەکرێن

هەڵمەتی نیشتمانی رواندنی یەك ملیۆن نەمام و سەوزكردنی كوردستان لەسەر بڕیار و راسپاردەی بافڵ جەلال تاڵەبانی سەرۆكی یەكێتیی نیشتمانیی كوردستان بەردەوامە و ئەمڕۆش هەڵمەتی  نەمام چاندن لەسنووری دوو پڕۆژەی دارستانی سەر بەبەڕێوەبەرایەتی دارستان و پاوانی سلێمانی بەڕێوەچوو.

لەمیانی بەشداریكردنی لەهەڵمەتەكەدا زانا رەحمان قائیمقامی قەزای پێنجوێن وێڕای ئەوەی بە گرنگییەوە باسی لەم هەڵمەتە نیشتمانییە كرد داواكارییەكی ئاراستەی لایەنە حزبی و سەرمایەدارەكان كرد كە بەهەمان شێوە پرۆژەی وەها جێبەجێبكەن و بەشداربن لە پاراستنی ژینگەی كوردستان وتیشی: "خەڵكی پێنجوێن بەگرنگیەوە لێی دەڕوانن و سوپاسی سەرۆك بافڵ جەلال تاڵەبانی دەكەن بۆ بەسەركردنەوەی قەزاكەیان".

هاوكات حسێن حەمەكەریم نوێنەری نووسینگەی سەرۆك بافڵ جەلال تاڵەبانی رایگەیاند ئەمڕۆ قۆناغێكی تری هەڵمەتەكەمان گەیاندە سنووری دوو پڕۆژەی دارستانی گرنگ كەئەوانیش پرۆژەی دارستانی كێلوو سەر بەهۆبەی دارستان و پاوانی پێنجوێن و پاركی دارستانی رازیانە بوون كەتوانیمان بڕێكی باش نەمامی تێدا بڕوێنین، وتیشی: "پێنجوێن ناسراوە بەزۆری رووبەری دارستانە سروشتی لەگەڵ ئەوەشدا پلانی بەڕێوەبەرایەتی دارستان و پاوانی سلێمانی زیادكردنی رووبەری دارستانی دەستكردی لەخۆگرتووە بۆیە هەڵمەتەكە قەزاكەی گرتەوە".

هەرلەوبارەیەوە عەلی ئەحمەد نوێنەری بەڕێوەبەرایەتی دارستان و پاوانی سلێمانی رایگەیاند: "لەهەڵمەتەكەدا ڕەچاوی ئەوەكراوە كەبەپێی چڕی دانیشتوان و دابەشبوونی، نەمامی پێویست بۆ ناوچەكان دابین بكرێت لەپێناو فەراهەمكردنی ژینگەیەكی لەبار و تەندروست بۆ دانیشتوانەكەی".

PUKMEDIA