هه‌مواری یاسای هه‌ڵبژاردن حزبه‌ كوردستانیه‌كان سه‌رقاڵ ده‌كات

PUKMEDIA

کۆبوونەوەی لایەنەکان سەبارەت با هه‌مواری یاسای هه‌ڵبژاردنه‌كانی په‌رله‌مانی كوردستان

پێنج حزبی كوردستانی له‌باره‌ی هه‌مواری یاسای هه‌ڵبژاردنه‌كانی په‌رله‌مانی كوردستان له‌هه‌ولێر كۆبوونه‌وه‌و جێگری سه‌رۆكی فراكسیۆنی یه‌كێتیش له‌ په‌رله‌مانی كوردستان ده‌ڵێت: "پێویسته‌ به‌زووترین كات هه‌مواری ره‌شنووسی یاسای هه‌ڵبژاردنه‌كان ته‌واو بكرێت و ئاڕاسته‌ی په‌رله‌مان بكرێت".

لوقمان وه‌ردی جێگری سه‌رۆكی فراكسیۆنی یه‌كێتی له‌په‌رله‌مانی كوردستان له‌كۆنگره‌یه‌كی رۆژنامه‌وانیدا رایگه‌یاند: "لیژنه‌ی هونه‌ری بۆ نووسینه‌وه‌ی ده‌قی هه‌مواری یاسای هه‌ڵبژاردنه‌كانی په‌رله‌مانی كوردستان، به‌ به‌شداری یه‌كێتی و پارتی و كۆمه‌ڵ و یه‌كگرتوو و گۆڕان كۆبووه‌وه‌".

" له‌كۆبوونه‌وه‌كه‌دا گفتوگۆی ورد له‌سه‌ر هه‌موو بڕگه‌ و مادده‌كانی هه‌مواری یاسای هه‌ڵبژاردن كراو تێڕوانینی هاوبه‌ش هه‌بوو، بۆئه‌وه‌ی بتوانین رێككه‌وتنێكی گشتگیر له‌سه‌ر هه‌مواری یاسای هه‌ڵبژاردنه‌كان بكه‌ین، له‌به‌رئه‌وه‌ی ره‌هه‌ندێكی نیشتمانی هه‌یه‌"، لوقمان وردی واده‌ڵێت.

ده‌شڵێت: "هه‌موو لایه‌نه‌كان ته‌ئكیدیان كرده‌وه‌ كه‌ به‌ زووترین كات ره‌شنووسی یاسای هه‌ڵبژاردنه‌كان ته‌واو بكرێت و ئاڕاسته‌ی په‌رله‌مانی كوردستانی بكرێت، بۆئه‌وه‌ی رێكاری یاسایی له‌په‌رله‌مانی كوردستان بۆ بگیرێته‌به‌رو هه‌موار بكرێته‌وه‌".

جێگری سه‌رۆكی فراكسیۆنی یه‌كێتی له‌ په‌رله‌مانی كوردستان وتیشی:"هه‌موو لایه‌نه‌كان به‌په‌رۆشن بۆئه‌وه‌ی بگه‌ین به‌رێككه‌وتنێكی گشتگیر، هه‌روه‌ها خاڵه‌ هاوبه‌شه‌كانمان زۆره‌و خاڵی ناكۆكمان كه‌مه‌، له‌ڕۆژانی ئاینده‌شدا كۆبوونه‌وه‌كان به‌رده‌وامده‌بن بۆئه‌وه‌ی بتوانین له‌ نزیكترین ده‌رفه‌تدا ره‌شنووسی هه‌مواری یاسای هه‌ڵبژاردنه‌كانی په‌رله‌مانی كوردستان ته‌واوبكه‌ین و ئاڕاسته‌ی په‌رله‌مانی كوردستانی بكه‌ین".
PUKMEDIA