به‌ئاماده‌بوونی سه‌رۆك كۆمار یادی كیمیابارانی هه‌ڵه‌بجه‌ كرایه‌وه‌

PUKMEDIA

پارێزگاری هه‌ڵه‌بجه‌ و سه‌رۆك كۆماری عیراق

ئه‌مڕۆ ١٦-٣-٢٠٢٣ له‌پارێزگای هه‌ڵه‌بجه‌ به‌ ئاماده‌بوونی د.له‌تیف ره‌شید سه‌رۆك كۆماری عیراق و شاناز ئیبراهیم ئه‌حمه‌د خانمی یه‌كه‌می عیراق و كونسوڵ و باڵیۆزی وڵاتان و ژماره‌یه‌ك سه‌ركرده‌و كه‌سایه‌تی حزبی و حكومی له‌مه‌راسیمێكدا ساڵیادی كیمیابارانكردنی هه‌ڵه‌بجه‌ به‌رزراگیرا.

له‌ مه‌راسیمه‌كه‌دا سه‌رۆك كۆماری عیراق وتارێكی پێشكه‌شكرد و رایگه‌یاند:" "دڵخۆشم به‌بڕیاره‌كه‌ی ئه‌نجومه‌نی وه‌زیرانی عیراق له‌باره‌ی به‌پارێزگا بوونی هه‌ڵه‌بجه‌، هه‌ڵه‌بجه‌ییه‌كان شایه‌نی خزمه‌تی زیاترن، چونكه‌ هه‌ڵه‌بجه‌ بوو خه‌بات و قوربانیدانی گه‌لی كوردی به‌جیهان ناساند ".

وتیشی:"هه‌ڵه‌بجه‌ییه‌كان شایه‌نی خزمه‌تی زیاترن و ئه‌وه‌ی پێمان بكرێت درێخی ناكه‌ین و شانازییه‌ ئه‌مڕۆ له‌گه‌ڵ هه‌ڵه‌بجه‌ییه‌كاندا بووم له‌ساڵیادی كاره‌ساتێكی جه‌رگبڕی وه‌ك كیمیابارانكردنی هه‌ڵه‌بجه‌".

هه‌ر له‌و چوارچێوه‌یه‌شدا شاناز ئیبراهیم ئه‌حمه‌د خانمی یه‌كه‌می عیراق تاجه‌گوڵینه‌ی رێز و وه‌فاداری له‌سه‌ر گڵكۆی شه‌هیدانی هه‌ڵه‌بجه‌ دانا و هاوكات ژماره‌یه‌كی زۆر تاجه‌گوڵینه‌ی كونسوڵ و باڵیۆزی وڵاتان و سه‌ركرده‌و كه‌سایه‌تی حزبی و حكومی له‌سه‌ر گڵكۆی شه‌هیدان دانرا.

یادكردنه‌وه‌ی ساڵیادی كیمیابارانكردنی هه‌ڵه‌بجه‌ له‌كاتێكدایه‌، ئه‌مساڵ ئه‌نجومه‌نی وه‌زیران بڕیاریدا كه‌ هه‌ڵه‌بجه‌ ببێته‌ 19 هه‌مین پارێزگای عیراق و له‌ئێستاشدا بڕیاره‌كه‌ی ئه‌نجومه‌نی وه‌زیران گه‌یشتوه‌ته‌ په‌رله‌مانی عیراق هه‌وڵده‌درێت به‌زووترین كات بڕیاره‌كه‌ بخرێته‌ دانیشتنه‌كانی په‌رله‌مانه‌وه‌.

PUKMEDIA