سەرۆک بافڵ: شەهید شەڕڤان و هەڤاڵەکانی رۆڵیان لە پاراستنی خاکی کوردستان هەبوو

نووسینگەی سەرۆکی یەکێتی

بافڵ جەلال تاڵەبانی سەرۆكی یەكێتیی نیشتمانیی كوردستان و شەهید فەرماندە شەڕڤان كۆبانێ

بافڵ جەلال تاڵەبانی سەرۆكی یەكێتیی نیشتمانیی كوردستان بۆ  شەهید بوونی فەرماندە شەڕڤان كۆبانێ و هەشت شەڕڤانی دیكە، پەیامێكی بڵاوكردەوە و رایگەیاند: " شەهید شەڕڤان و هەڤاڵەكانی خاكی پیرۆزی كوردستانیان لە دەستی رەشی تیرۆر پاراست و مێژوویەكی پڕ لە سەروەرییان تۆماركرد، شەهیدبوونیان لەدڵەوە نیگەرانی كردین".

دەقی پەیامەكە:

 شەهیدبوونی فەرماندە (شەڕڤان كۆبانێ) فەرماندەی هێزەكانی دژەتیرۆری رۆژئاوا و هەشت هەڤاڵی تری، لە دڵەوە نیگەرانی كردین.

‌‎شەهید شەڕڤان و یەكینەكانی دژەتیرۆر (YAT) رۆڵێكی كاریگەریان گێڕا لە رووبەڕووبوونەوەی چەكدارانی داعش لە رۆژئاوا و خاكی پیرۆزی كوردستانیان لە دەستی رەشی تیرۆر پاراست و مێژوویەكی پڕ لە سەروەرییان تۆماركرد.

‌‎یەكێتیی نیشتمانیی كوردستان شانازی بەو مێژووە درەوشاوەیەوە دەكات كە هێزەكانی دژەتیرۆر (CTG) هاوشانی یەكینەكانی دژەتیرۆری رۆژئاوا لەپێناو پاراستنی خاكی كوردستان و خەڵكە تێكۆشەرەكەیدا خەباتیان كردووە و داستانی قارەمانانەیان تۆماركردووە.

‌‎پرسە و هاوخەمی قووڵی خۆمان ئاڕاستەی هەڤاڵ مەزڵوم كۆبانێ، هێزەكانی سوریای دیموكرات (هەسەدە)، یەكینەكانی دژەتیرۆر و سەرجەم خەڵكی كوردستان بەتایبەت هاونیشتمانیانمان لە رۆژئاوای كوردستان دەكەم و هاوبەشی ئەم خەمە گەورەیەین.

‌‎رۆحی هەڤاڵان شادبێت و دروود بۆ گیانی شەهیدانی رێگای ئازادی

‌‎بافڵ جەلال تاڵەبانی
‌‎سەرۆكی یەكێتیی نیشتمانیی كوردستان

PUKMEDIA