وەهاب هەڵەبجەیی:هەوڵەکان بۆ هاوکاری لێقەوماوانی رۆژئاوا دەخەینەگەڕ

راگەیاندنی دژەتیرۆری کوردستان

سەردانی وەهاب هەڵەبجەیی و وەفدی یاوەری بۆ رۆژئاوا

مەزڵوم عەبدی فەرماندەی گشتی هێزەکانی سوریای دیموکرات (هەسەدە) لە ڕۆژئاوای کوردستان پێشوازی لە وەهاب هەڵەبجەیی بەڕێوەبەری گشتی دژەتیرۆری کوردستان و وەفدی یاوەری کرد.

پاشان لە کۆبونەوەیەکدا پرسی هەماهەنگی و کاری هاوبەش بۆ بەرەنگاربوونەوەی پاشماوەی تیرۆرستان تاوتوێکرا.

هاوکات  هەر لە رۆژئاوای کوردستان ساڵح موسلیم هاوسەرۆکی پارتی یەکێتی دیموکرات (پەیەدە) پێشوازی لە وەهاب هەڵەبجەیی بەڕێوەبەری گشتی دژەتیرۆری کوردستان و وەفدی یاوەری کرد.

لە کۆبونەوەیەکدا گفتوگۆکرا دەربارەی پەیوەندییەکانی کورد لەسەر ئاستی کوردستان بە گشتی و بەتایبەت پەیوەندییەکانی باشوور و ڕۆژئاوای کوردستان، جەختکرایەوە لەسەر زیادکردنی هاوکارییە مرۆییەکان بۆ ئەو ناوچانەی ڕۆژئاوای کوردستان کە لە بومەلەرزەکەی رۆژی 06-02-2023 زیانیان پێگەیشت.

لای خۆشیەوە وەهاب هەڵەبجەیی بەڕێوەبەری گشتیی دژەتیرۆر، بەڵێنیدا کە سەرجەم داواکارییەکان بگەیەنێتە بافڵ جەلال تاڵەبانی سەرۆکی یەکێتی نیشتیمانیی کوردستان، بەمەبەستی هاوکاریکردنی زیاتری زیانلێکەوتووانی ڕۆژئاوا.

PUKMEDIA