دەزگای ئاسایشی هەرێم 8 تیرۆریستی داعش دەستگیر دەکات

راگەیاندنی ئۆپەراسیۆنەکانی دەزگای ئاسایشی هەرێم

دەستگیرکراوان

بەڕێوەبەرایەتی ئۆپەراسیۆنەکانی دەزگای ئاسایشی هەرێم لە چەند هەڵمەتێکی جیادا ٨  تیرۆریستی داعش دەستگیر دەکات .

بەڕێوەبەرایەتی ئۆپەراسیۆنەکانی دەزگای ئاسایشی هەرێم لە راگەیەنراوێکدا کە وێنەیەکی بۆ PUKMEDIA نیردراوە رایدەگەیەنێت: لەسەر بنەمای هەماهەنگی و  هەواڵگری بەهاوکاری دەزگا ئەمنییەکانی عیراق زانیاری دروست بەدەست هات لەسەر ژمارەیەک تیرۆریستی داعشی لەیاسا هەڵهاتوو کە بەمادەی ٤ تیرۆر داواکراوبوون لەلایەن دەزگای ئاسایشی نیشتمانی ، دەزگای هەواڵگری ، دژەتیرۆر ، یەکەی وەڵامدانەوەی خێرای عیراق کە بەمەرامی خۆحەشاردان رویان لە هەرێمی کوردستان کردوە و لە سنوری پارێزگای سلێمانی نیشتەجێ بوون .

راشیگەیاندووە: دوای رەزامەندی دادوەری ئاسایش، لێکۆڵینەوەی مەیدانی لەسەر ئەم کەیسە دەستیپێکرد و دوای چەندین رۆژ بەدواداچوون سەرئەنجام شوێنی مانەوەی داواکراوەکان دەست نیشانکران و خرانە ژێر چاودیری هێزەکانمانەوە . پاش دڵنیابوونەوە لە چەند  ئۆپەراسیۆنێکدا  بە هاوکاری بەڕێوەبەرایەتی ئاسایشی سلێمانی ، بەڕێوەبەرایەتی ئاسایشی رۆژئاوای سلێمانی لە شەوانی ١٥ ، ١٦ ، ١٧ ،(  ٢٣ / ٢٤ ) ، ( ٢٦ / ٢٧ ) ی ٣ ی ٢٠٢٣ هەر ٨ تیرۆریستی تۆمەتبار  کە بەرەگەز عەرەب بوون ( ع .خ )  ، ( ع .ن  ) ، ( م .م  ) ، ( ع .ف )  ،(  ئ .ف)  ، ( ئ . ن ) ، ( ق . ئ ) ، (  ع . ئ ) دەستگیرکران 

هەر لە راگەیەنراوەکە بەڕێوەبەرایەتی ئۆپەراسیۆنەکانی دەزگای ئاسایشی هەرێم ئاماژەی بەوەکردووە، بۆ هەموولایەکیش رووندەکەینەوە لەبەر سەلامەتی رێڕەوی لێکۆڵینەوەکان بەشێک لە زانیارییەکان بە نهێنی هێڵراونەتەوە و سەرجەم دەستگیرکراوەکان رووبەڕووی دەسەڵاتی دادوەری کراونەتەوە .

PUKMEDIA