سه‌رۆك بافڵ: كاتی بڕ‌یاره‌ دروسته‌كه‌ی پرسی نه‌وته‌

PUKMEDIA

بافڵ جەلال تاڵەبانی سەرۆکی یەکێتیی نیشتمانیی کوردستان

بافڵ جه‌لال تاڵه‌بانی سه‌رۆكی یه‌كێتیی نیشتمانیی كوردستان له‌ په‌یامێكدا رایده‌گه‌یه‌نێت:" دوای بڕیاره‌كه‌ی دادگای پاریسی و راگرتنی هه‌نارده‌ی نه‌وتی هه‌رێم كاتی ئه‌وه‌یه‌ بڕیاره‌ دروسته‌كه‌ بدرێت له‌پێناو داهاتوزوی میله‌ته‌كه‌مان و رێگریكردن له‌دروستبوونی گرفت و قه‌یرانی گه‌وره‌".

 سه‌رۆك بافڵ له‌ په‌یامێكیدا كه‌ ئه‌مڕۆ 2-4-2023 سه‌باره‌ت به‌ كه‌یسی نه‌وت و بڕیاره‌كه‌ی دادگای پاریس بڵاویكرده‌وه‌ ده‌ڵێت:"كۆمپانیای سۆمۆ نه‌وتی هه‌رێمی كوردستان بفرۆشێت و كۆی داهاتی نه‌وت له‌ سه‌رتاسه‌ری عیراق بچێته‌ یه‌ك خه‌زێنه‌وه‌و پشكی هه‌رێمی كوردستانیش له‌ بودجه‌ و داهاتی عیراق دیاری بكرێت و مووچه‌ی فه‌رمانبه‌ر و خانه‌نشینانی هه‌رێم گه‌ره‌نتی بكرێت" و دووپاتیشی ده‌كاته‌وه‌ "یه‌كێتیی نیشتمانیی كوردستان رووبارێك خوێنی له‌پێناو سه‌ربه‌رزی و سه‌رفرازیی كوردستان رشتووه‌ و هیچ هێز و لایه‌نێك له‌ خۆمان به‌ دڵسۆزتر نازانین بۆ كوردستان و به‌دیهێنانی به‌رژه‌وه‌ندییه‌ باڵاكانی".

ده‌قی په‌یامه‌كه‌ی سه‌رۆكی یه‌كێتی...

دوای بڕ‌یاره‌كه‌ی دادگای پاریس و راگرتنی هه‌نارده‌كردنی نه‌وتی هه‌رێمی كوردستان له‌ڕ‌ێگه‌ی توركیاوه‌، له‌پێناو داهاتووی میلله‌ته‌كه‌مان و رێگریكردن له‌ دروستبوونی گرفت و قه‌یرانی گه‌وره‌، كاتی ئه‌وه‌یه‌ بڕ‌یاره‌ دروسته‌كه‌ بدرێت.

‌‎كۆمپانیای سۆمۆ نه‌وتی هه‌رێمی كوردستان بفرۆشێت و كۆی داهاتی نه‌وت له‌ سه‌رتاسه‌ری عیراق بچێته‌ یه‌ك خه‌زێنه‌وه‌.
‌‎پشكی هه‌رێمی كوردستان له‌ بودجه‌ و داهاتی عیراق دیاری بكرێت و مووچه‌ی فه‌رمانبه‌ر و خانه‌نشینانی هه‌رێم گه‌ره‌نتی بكرێت.
‌‎سیسته‌می به‌نزین، نه‌وت و گازوایلی هه‌رێمی كوردستان ببه‌سترێته‌وه‌ به‌ عیراق و به‌هه‌مان نرخ بدرێته‌وه‌ به‌ هاوڵاتیان.
‌‎نوێنه‌ری هه‌رێمی كوردستان له‌ كۆمپانیای سۆمۆ و كۆی سیسته‌می نه‌وت و غازی عیراق هه‌بێت و به‌شێكبن له‌ به‌ڕ‌ێوه‌بردن و بڕ‌یاردان.

‌‎یه‌كێتیی نیشتمانیی كوردستان ساڵانێكه‌ هه‌وڵ بۆ رێككه‌وتن له‌گه‌ڵ به‌غدا و كۆتاییهێنان به‌ ناكۆكییه‌كان ده‌دات. بیركردنه‌وه‌ی دروست، هه‌ماهه‌نگی و كاری پێكه‌وه‌ییه‌ نه‌ك دووركه‌تنه‌وه‌ و قووڵكردنه‌وه‌ی كێشه‌كان. ناكۆكییه‌ ناوخۆییه‌كان و تاكڕ‌ه‌وی، قه‌واره‌كه‌مان لاواز ده‌كات و هه‌رێمه‌كه‌مان ده‌خاته‌ مه‌ترسییه‌وه‌ نه‌ك كاری هاوبه‌ش و داواكردنی مافه‌كانمان له‌ به‌غدا.

یه‌كێتیی نیشتمانیی كوردستان رووبارێك خوێنی له‌پێناو سه‌ربه‌رزی و سه‌رفرازیی كوردستان رشتووه‌ و هیچ هێز و لایه‌نێك له‌ خۆمان به‌ دڵسۆزتر نازانین بۆ كوردستان و به‌دیهێنانی به‌رژه‌وه‌ندییه‌ باڵاكانی. هه‌ر بۆیه‌ هه‌نگاوی لۆژیكی و به‌رپرسیارانه‌، رێككه‌وتنه‌ له‌گه‌ڵ به‌غدا و ده‌سته‌به‌ركردنی مافه‌كانمانه‌.

‌‎بافڵ جه‌لال تاڵه‌بانی
‌‎سه‌رۆكی یه‌كێتیی نیشتمانیی كوردستان

PUKMEDIA