یەكێتی وەبەرهێنەران: سلێمانی ئارامە

ئاژانسەكان

شاری سلێمانی

لقی سلێمانی یەكێتی وەبەرهێنەرانی كوردستان لە بەیاننامەیەكدا ئەو راگەیەندراوە رەتدەكاتەوە كە لەبەشێك لە میدیاكانەوە سەبارەت بە رووداوەكەی شاری دایك بڵاوكراوەتەوە و رایدەگەیەنێت: "شار ئارامە و لەسلێمانی یاساو دادگا هەیە".

دەقی بەیاننامەكە:

بەیاننامەیەك لە یەكێتی وەبەرهێنەرانی كوردستان بۆ رای گشتی

لە كاتێكدا، ئێمە تاو و توێی نووسینی راگەیەنراوێكی ناڕەزایی خۆمان سەبارەت بەو رووداوەی ئەمڕۆی شاری دایك دەكرد، كەسانی نابەرپرس و هەلپەرست و میدیای بێ مۆراڵ و بێ پرس، دێن بە ناوی لقی سلێمانی یەكێتی وەبەرهێنەرانی كوردستان راگەیەندراو بڵاو دەكەنەوەو خەشم و قینی خۆیان دەرهەق بەم شارەو ئارامییەكەی هەڵدەرێژن و راگەیەنراو تەخشان دەكەن و میدیای پێ جۆش دەدەن و دەروونی هاووڵاتیانی ئەم شارە لەم مانگە پیرۆزەدا سەربار لە ترسو دڵەراوكێ دەكەن.

ئێمە لە یەكێتی وەبەرهێنەرانی كوردستان – لقی سلێمانی سەر لەبەری ئەو راگەیەندراوەی لە بەشێك لە میدیاكان بڵاوبووەتەوە رەتدەكەینەوە و شاریش ئارامە و ئەوانەشی فوو لە ئاگری ناكۆكی و ناهەموواری دەكەن و دڵیان بەوە خۆشە بە رووداوێك شار سەرو ژێر بكەن خەیاڵیان خاوە، لەم شارەدا یاساو دادگا هەیە و رێكاری پێویستیش گیراوەتە بەر.

یەكێتی وەبەرهێنەرانی كوردستان – سلێمانی
2-4-2023

PUKMEDIA