سەرۆك كۆمار جەخت لەپێویستی چەسپاندنی سەقامگیری ئابووری لە وڵاتدا دەكاتەوە

PUKMEDIA

د. لەتیف جەمال رەشید سەرۆككۆمار و عەلی عەلاق پارێزگاری بانكی ناوەندی .

سەرۆككۆمار دكتۆر لەتیف جەمال رەشید، ئەمڕۆ 6-4-2023، لە كۆشكی بەغداد پێشوازیكرد لە عەلی موحسین عەلاق پارێزگاری بانكی ناوەندی عیراق.

 لە میانی دیدارەكەدا، هەردوولا  باسیان لە بارودۆخی ئابووری و دارایی وڵات و سیاسەتی دراوی بانكی ناوەندی و هەوڵەكانی كرد بۆ باشتركردنی بەهای ئاڵوگۆڕی دیناری عیراقی، هەروەها بەڕێزیان ئاماژەیدا بە پێویستی چەسپاندنی سەقامگیری ئابووری وڵات بەگوێرەی تێڕوانینێكی گشتگیر.

 سەرۆك كۆمار گرنگی پەرەپێدانی كەرتی بانكی ڕوونكردەوە بە سود وەرگرتن لە نوێترین داتای تەكنیكی و كاركردن بۆ پاڵپشتیكردنی پڕۆژەكانی گەشەپێدان و وەبەرهێنان و بەدواداچوون بۆ كاری بانكە تایبەتەكان و كۆمپانیاكانی ئاڵوگۆڕكردن و بەرەنگاربوونەوەی كارەكانی سپیكردنەوەی پارە بە شێوەیەك كە ئابووری نیشتمانی و موڵكی هاووڵاتیان بپارێزێت.

 لای خۆیەوە عەلی عەلاق هەوڵە جددییەكان بانكی ناوەندی لە پەرەپێدانی كارەكانیدا دووپاتكردەوە، سوپاس و پێزانینی خۆی بۆ گرنگیدانی سەرۆك كۆمار دەربڕی بۆ پێشخستنی كارەكانی بانكی ناوەندی كە زامنی سەقامگیری ئابووری و دارایی دەكات لە وڵاتدا.

PUKMEDIA