ئاسايشی رۆژئاوای سلێمانی دوو گروپی تیرۆریستی دەستگیر دەکات

PUKMEDIA

لۆگۆی بەڕێوەبەرایەتی ئاسایشی پارێزگای سلێمانی

هێزەکانی ئاسایشی رۆژئاوای سلێمانی دوو گروپی سەر بە رێکخراوە تیرۆریستیەکان دەستگیر دەکەن کە گروپی یەکەمیان لە سێ کەس پێکهاتبوون و گروپی دووەمیان لە چوار کەس پێکهاتبوون.

ئاسايشی رۆژئاوای سلێمانی ئەمڕۆ هەینی ٧-٤-٢٠٢٣، لە بڵاوکراوەیەکدا ئاماژەیان بە دەستگیرکردنی دوو گروپی سەر بە رێکخراوە تیرۆریستیەکان کردووە.

دەقی بڵاوکراوەکەی ئاسايشی رۆژئاوای سلێمانی

دەرەنجامی قەڵاچۆکردنی شوێنکەوتوان و هەڵگرانی بیروباوەڕی رێکخراوە تیرۆریستیەکان، هێزەکانی ئاسایشی ڕۆژئاوای سلێمانی ( دوو ) گرووپی سەربەڕێکخراوە تیرۆریستیەکانی ئاشکرا کرد  .

پاش بەدەستهێنانی زانیاری وورد ودروست لەسەر ئەندامەکانیان و ناسنامەو شوێنی مانەوەیان بە فەرمانی دادوەری دادگای لێکۆڵینەوە هەردوو گروپەکە خرانە ژێر چاودێری وورد و لە چەند ئۆپراسیۆنێکی تایبەتدا سەرجەمیان دەستگیر کران .

گروپی یەکەم پێکهاتوون لە ( سێ ) کەس کە سەر بە ڕێکخراوی تیرۆریستی ( داعش )ن :
١_ ( ک ، ش ، ک )   ٢_ ( ش ، د ، م )   ٣_ ( س ، ع ، ج ) دانیشتوی ناحیەی تەکیە ی سەر بە قەزای چەمچەماڵن.

گروپی دووەم پێکهاتوون لە ( ٤ ) کەس ١_ ( ش ، خ ، ح ) ٢_ ( ڕ ، ع ، ا ) ٣_ ( ب ، ه ، ن ) ٤_ ( ا ، س ، م )، دانیشتوی قەزای چەمچەماڵن، کاری رێکخراوەییان بە نهێنی لە ( ماڵان و شاخ و کێوەکانی ) نزیک ناحیەی تەکیە ئەنجامداوە، پیلان و بەرنامەکانیان دژبە مرۆڤایەتی و کۆمەڵگا بۆ تێکدانی ئارامی و ئاسایش داڕشتووە، پاشان لەڕێگەی سۆشیال میدیاوە بەناوی چەند ( پەیج و ئەکاونتێک )ی جیا جیاوە بیروباوەڕی توندڕەویان بڵاوكردۆتەوە.

بەچاوکراوەیی و لێهاتووی و شەونخونی هێزەکانی ئاسایش بە هاوکاری بەڕێوەبەرایەتی ئۆپراسیۆنەکانی دەزگای ئاسایشی هەرێم و هەماهەنگی کەسانی دڵسۆزی گەل و نیشتیمان توانرا سەرجەم تیرۆریستان دەستگیربکرێن و پیلان و بەرنامەکانیان پوچەڵکرانەوە.

PUKMEDIA