مەکتەبی سیاسی: کەمینەیەکی ناو پارتی هەوڵی تێکدانی ئاسایشی هەرێم و سلێمانی دەدەن

PUKMEDIA

لۆگۆی یەکێتیی نیشتمانیی کوردستان

مەکتەبی سیاسی یەکێتیی نیشتمانیی کوردستان ئیدانەی هێرشەکەی سەر فرۆکەخانەی سلێمانی دەکات و رایدەگەیەنێت، " هێرش کردنە سەر فرۆکەخانەی  نێو دەوڵەتی سلێمانی، پیلانێکی پێشوەختە بۆ دارێژراوی مخابەراتی و جاسوسیانەی دەرەکی و ناوخۆییە کە هەروەک چاوساغی  هێنانی  لەشکری  داگیرکەرە بۆ نێو خاکی  هەرێمی کوردستان و بەتوندی ئیدانەی دەکەین".

دەقی راگەیەندراوەکەی مەکتەبی سیاسی

هێرش کردنە سەر فرۆکەخانەی  نێو دەوڵەتی سلێمانی ، پیلانێکی پێشوەختە بۆ دارێژراوی  مخابەراتی و جاسوسیانەی دەرەکی و ناوخۆییە کە هەروەک چاوساغی  هێنانی  لەشکری  داگیرکەرە بۆ نێو خاکی  هەرێمی کوردستان، بۆیە ئەم پەلاماردانە بە توندی ئیدانە دەکەین، چاوەرێ‌ بووین  لایەنی پەیوەندیدار لەبری پاساو هێنانەوەو ڕەویەتیدانی کوێرانە بەم تاوانە، رێوشوێن و بەدواداچوون و سەرکۆنەی بکردایە، بەڵام وەک پیشەی رابردوییان کەمینیەکی خۆسەپێنی نێو پارتی، کە پەیوەندی ژێر بە ژێر و تایبەتیان هەیە، دەبنە چاوساغ و دام و دەزگاکانی حکومەت بۆ کاری هەواڵگری دەوڵەتان و تێکدانی ئاسایشی هەرێمی کوردستان و پارێزگای سلێمانی بەکاردێنن.

یەکێتیی نیشتمانیی کوردستان، هەمیشە  بروای بە یەکێتیی و یەکڕیزی خەڵک و لایەنە سیاسیەکانی کوردستان بووە، هەروەک ئامانجی بووە لەسەر ئاستی بەشەکانی تری کوردستانیش هاوکاری و هەماهەنگی و پەیوەندی دۆستانە هەبێت لەسەر بنەمای پاراستنی بەرژەوەندییە نەتەوەییەکان، هەروەک دەستدرێژی و هێرشکردنە سەر هەر ناوچە و پارێزگایەکی هەرێمی کوردستان بە تاوان دەزانێت و سەرکۆنەی دەکات، چونکە لەچوارچێوەی دیدی نەتەوەییانەی خۆی هەموو هەرێمی کوردستان بە پیرۆز دەبینێت و لەم پێناوەدا خەباتی نەپساوەی کردووە و خوێنی رشتووە.
روورەشی بۆ دوژمنانی کورد و دەستوپێوەند و چاوساغەکانیان


مەکتەبی سیاسی
یەکێتیی نیشتمانیی کوردستان