ئەنجومەنی نوێنەرانی عیراق پشتیوانی لە سلێمانی دەكات

پارێزگاری سلێمانی

كۆنگرەی هاوبەشی وەفدی ئەنجومەنی نوێنەران و پارێزگای سلێمانی

وەفدێكی ئەنجومەنی نوێنەران بەمەبەستی لێكۆڵینەوە لە رووداوەكەی فڕۆكەخانەی نێودەوڵەتی سلێمانی سەردانی پارێزگای سلێمانیان كرد و سەرۆكی لیژنەی ئاسایش و بەرگری ئەنجومەنی نوێنەرانی عیراق رایگەیاند: "پشتیوانی تەواو لە پارێزگای سلێمانی دەكەین".

لە كۆنگرەیەكی رۆژنامەوانیدا عەباس زاملی سەرۆكی لیژنەی ئاسایش و بەرگری ئەنجومەنی نوێنەرانی عیراق كە ئەمڕۆ لە شاری سلێمانی ئەنجامیدا رایگەیاند: "هێرشكردنەسەر هەر خاكی عیراق ئیدانە دەكەین بەتایبەتی ئەو هێرشەی كرایەسەر فڕۆكەخانەی سلێمانی و داوا لە حكومەتی عیراق دەكەین راپۆرتێكی هێرشەكانی توركیا بۆ نەتەوە یەكگرتوەكان بەرز بكاتەوە، پشتیوانی تەواو لە پارێزگای سلێمانیش دەكەین".

"وەك لیژنەی ئاسایش و بەرگری سەردانی شوێنی روداوەكەی فڕۆكەخانەی سلێمانیمان كرد و راپۆرتی خۆمان پێشكەشی سەرۆكایەتی ئەنجومەنی نوێنەران دەكەین" زاملی وادەڵێت.

هاوكات د. هەڤاڵ ئەبوبەكر پارێزگاری سلێمانی دڵنیایی دایە هاووڵاتیان لە ئارامی شارەكە و رایگەیاند: "هاتنی وەفدەكەی ئەنجومەنی نوێنەران بۆ ئەوەی لە نزیكەوە ئاگاداربوون و لێكۆڵینەوەیە لە راگرتنی گەشتەكانی توركیا لەگەڵ فڕۆكەخانەی سلێمانی و بە هێرشكردنەسەر فڕۆكەخانەكەیە".

"وەفدەكەی ئەنجومەنی نوێنەرانی عیراق پشتیوانی خۆیان دەربڕی و تەئكیدیان كردەوە، هەر هێرشێك بۆسەر سلێمانی و هەرێمی كوردستان هێرشە بۆسەر هەموو خاكی عیراق و كاردەكەن تا ئەم پێشێلكارییانە دووبارە نەبنەوە" د. هەڤاڵ ئەبوبەكر وادەڵێت.

 ئێوارەی 7-4-2023، هێرش كرایەسەر فڕۆكەخانەی نێودەوڵەتی سلێمانی و ئەمەش كاردانەوەی ناوخۆیی و دەرەكی لێكەوتەوە.

PUKMEDIA