زێرەڤانی لەهەولێر و دهۆک رێگری لەرووماڵکردنی راگرتنی مووچە دەکەن

ئاژانسەکان

رێگری لەدابەشکردنی مووچەی خانەنشینانی پێشمەرگەکانی یەکێتی

هێزەکانی زێرەڤانی لەهەولێر و دهۆک رێگە بە تیمەکانی کەناڵەکانی راگەیاندن نادەن رووماڵی راگرتنی مووچەی خانەنشینانی پێشمەرگەکانی یەکێتی بکەن و هێرشدەکەنە سەر رۆژنامەنووسان و پەیامنێر و وێنەگری کەناڵی NRT دەستگیردەکەن.

پەیامنێرمان لەهەولێر پێی راگەیاندین:"بەبڕیارێکی سیاسی مووچەی خانەنشینی پێشمەرگەکانی یەکێتی لەهەولێر و دهۆک راگیراوەو هێزێکی زۆری زێرەڤانیش لەدەوروبەری بانکەکانی هەولێر و دهۆک بڵاوەیان پێکراوە و هەڕەشە لەخانەنشینان و رۆژنامەنووسان دەکەن،"ئەگەر بەردەم بانکەکان چۆڵنەکەن بەزەبری چەک پێیان چۆڵدەکەن".

پەیامنێرمان راشیگەیاند: لەلایەن هێزی زێرەڤانییەوە رێگری لەپەیامنێران و رۆژنامەنووسان دەکرێت رووماڵی راگرتنی مووچەی خانەنشینی پێشمەرگەکانی یەکێتی بکەن، لەوچوارچێوەیەشذا پەیامنێری NRT بەناوی (هێرش قادر) لەلایەن هێزەکانی زێرەڤانییەوە دەستبەسەرکراوە.

ئەمەش لەکاتێکدایە لەسلێمانی پارەی پێویست بۆ مووچەخۆرانی پارتی (ئەیلول و گوڵان) لەرانیەوە نێردراوە و هیچ کێشەیەک لەدابەشکردنی مووچەی پێشمەرگەکانی پارتیدا نییە، بەڵام لەهەولێر و دهۆک بەبیرکردنەوەی تەسکی حزبی رێگری لە دابەشکردنی مووچەی خانەنشینانی پێشمەرگەکانی یەکێتی دەکرێت و کێشەیان بۆ دروستدەکرێت.

یەکێتیی نیشتمانیی کوردستان تاکە حزبە لەهەرێمی کوردستان داوای راگرتنی سیاسەتی چەوتی حکومڕانی هەرێمی کوردستان دەکات و لەوچوارچێوەیەشدا باڵێکی پارتی لەحکومەت هەموو کارێک دەکات گرفت بۆ پێشمەرگە و لایەنگر و هەوادارەکانی ئەو زۆنەی کەلەژێر دەستی یەکێتیدایە دروستبکات.

PUKMEDIA