پەرلەمانتارێکی یەکێتی: حوکمداری بەهەموو کەس ناکرێت

PUKMEDIA

حکومداری

پەرلەمانتارێکی یەکێتی لەپەرلەمانی کوردستان رایدەگەیەنێت:"مەسرور بارزانی حکومەتی داگیرکردووە بۆ بەرژەوەندی تایبەتی خۆی"، دەشڵێت:" :"پێویستە حکومەت بزانێت حوکمداری عەسکەری نییە و بەهەموو کەس ناکرێت، کورەکەم کە هێشتا تەمەنی ١٨ ساڵ نەبووە باشتر لەوان دەزانێت حکومڕانی بکات".

شیرین یونس پەرلەمانتاری یەکیتی لە پەرلەمانی کوردستان لەمیانەی چاوپێکەتنێکیدا لەبەرنامەی سەعات ١:٠٠ی کەناڵی گەلی کوردستان وتی:"ئەوەی لەشاری هەولێر کە پایتەختی هەرێمی کوردستانە دەیبینین لەهیچ شوێنێکی دیکە نەبینراوە، بەجۆرێک مەسرور بارزانی حکومەتی داگیرکردووە بۆ بەرژەوەندی تایبەتی خۆی".

هاووڵاتیانی دهۆک و بادینان ناتوانن هیچ وشەیەک بڵێن

وتیشی:"بەوپێیەی شوێنی کارمان لەناو شاری هەولێرە، ئیمە رۆژانە چەندین کارەساتی جۆراوجۆر دەبینین لەسەر رەفتارێکی سادە خەڵک دەکوژرێت سەردەتاشرێت ئەتکی خەڵک دەکەن تەنانەت هاووڵاتیانی دهۆک و بادینان ناتوانن هیچ وشەیەک بڵێن لەسەر قسەیەک دەیانخەنە زیندان و سزا دەدرێت وەک ئەوەی لەزیندانیانی بادینان بینیمان.

حکومداری عەسکەری نییە

شیرین یونس ئاماژەی بەوەشکرد:"پێویستە حکومەت بزانێت حوکمداری عەسکەری نییە  و بەخۆیدا بچێتەوە، کورەکەم کە هێشتا تەمەنی ١٨ ساڵ نەبووە باشتر لەوان دەزانێت حکومڕانی بکات".

راشیگەیاند:"بڕینی مووچەی پێشمەرگەکانی یەکێتی شتێکی نامۆ و نوێ نییە، چونکە ئەوان هاتوونەتە سەر حازری، کەسێکیش ئەرکی بە شتێکەوە نەکێشابێت هەموو شتێکی لێ دەوەشێتەوە، بەداخەوە لەگەڵ هاتنی جەژنی پیرۆزی رەمەزاندا نەک تەنها مسوڵمانان بەڵکو ئاینەکانی تریش پەیامی ئاشتی و خۆشگوزەرانی بڵاودەکەنەوە، کەچی لە هەولێر و دهۆک قوتی پێشمەرگە و خانەنشینان دەبڕدرێت".

"لەرابردوودا ئەوەی بەعس کردی لەکوشتارو کیمیاباران و ئەنفال، بەڵام ئامادە نەبوو دەست بۆ قوت و مووچە و بەشەخۆراکی هاووڵاتیان ببات"شیرین یونس وایوت.  

یەکێتی تەنها خۆی بەخاوەنی سلێمانی نازانێت

ئەو پەرلەمانتاری یەکێتی لەپەڕلەمانی کوردستان وتیشی:" ئێمە تەنها خۆمان بەخاوەنی سلێمانی نازانین، بەڵکو خاوەنی سەرجەم ناوچەکانی هەرێمی کوردستانین و ئێمە لەراپەڕین هەولێرمان ئازادکرد و بەکردارە ناشرینەکانیان ناوەستین و زیاتر سووردەبین لەسەر داواکردنی مافی هاووڵاتیانی هەرێمی کوردستان". 

ئەوانەی لەهەولێر دەگوزەرێن بەپشتی کەسانێکە

ئاماژەی بەوەشکرد:"ئێمە لەگەل تەواوی خەڵکی شاری هەولێرین دەنگی هەموو ئەو دەنگە کپکراوانەین کە هەموو شتێکی خراپیان بەرامبەر دەکرێت و دەبێت بەزۆر بەشان و باڵی پارتیدا هەڵبەن، بەیانی هەڵدەستین لەهەولێر کەسێک کوژراوە یان ئەتک کراوە یاخود سەریتاشراوە، دیارە کە ئەمانەی لەو شارە دەگوزەرێن بەپشتگیری کەسانێکە".

وتیشی:"سلێمانی پایتەختی رۆشنبیری و شوێنی دەربڕینی دەنگی هەموو هاووڵاتیانی هەرێمە بە ئازادانە، پێویستە هاووڵاتیان لەخۆیان بپرسن بۆچی تا ئێستا حزبێکی ئۆپۆزسیۆن لەهەولێر کە پایتەختی هەرێمی کوردستانە نییە، بەڵام لە سلێمانی چەندین حزب هەن.

PUKMEDIA