هێزە ئەمنییەکانی هەولێر رووداوەکان دەشارنەوە و دۆسییەکانیان دادەخەن

ئەرشیف

هەولێر

لەژێر فشاری کەناڵەکانی راگەیاندندا هێزە ئەمنییەکانی هەولێر راستییەکەیان درکاند و پشتراستیانکردەوە کە برایەکی ئومێد سەباح سەرۆکی دیوانی ئەنجومەنی وەزیران لەسەر فول لایت گەنجێکی کوشتووە، پەرلەمانتارێکیش دەڵێت:"سیاسەتی چەوتی حکومڕانی پارتی لەهەولێر وایکردووە رۆژ لەدوای رۆژ کوشتن و سوکایەتیکردن و ئەتککردن و دەستدرێژی سێکسی زیاد بکات و خەڵکی هەولێر ئارامییان لێ هەڵبگیرێت.

ناسر ئەحمەد ئەندامی لیژنەی ناوخۆ لەپەرلەمانی کوردستان بە سایتی رەسمی یەکێتیی نیشتمانیی کوردستان PUKMEDIA ی راگەیاند:"سیاسەتی چەوتی پارتی لەهەولێر بارودۆخێکی دروستکردووە کەتەنها بۆ خۆیان هەولێر ئارام بێت و بۆ خەڵک نائارام، بەڕۆژی رووناک لەلایەن چەکداری پارتییەوە لەناو شاری هەولێر خەڵک دەکوژرێت و ئەتکدەکرێت و سەری دەتاشرێت و ئازار دەدرێن و سەرانەیان لێ وەردەگیرێت و هیچ مانایەک بۆ ژیان لەو شارە نەماوە.

پارتی هەوڵی تێکدانی بارودۆخی سلێمانی دەدات

"پارتی وەک پیشەی هەمیشەیی پەردەپۆشی رووداو کارەساتەکانی لەرێی هێزە ئەمنییەکانەوە دەکات و لەبەرامبەریشدا هەوڵی تێکدانی بارودۆخی سلێمانی دەدات ئەمەش لەپێناو ئەوەی چاوی خەڵک رووبکاتە سلێمانی و تاوانەکانی خۆیانی پێ دیزەبەدەرخۆنە بکەن"ناسر ئەحمەد وایوت

پۆلیسی هەولێر راگەیەنراویکی لەبارەی کوشتنی گەنجەکە بڵاوکردەوە

شەوی رابردوو لەژێر فشاری کەناڵەکانی راگەیاندندا بەرێوەبەرایەتی پۆلیسی هەولێر راگەیەنراویکی لەبارەی کوشتنی گەنجێک لەشەقامی ١٢٠ مەتری هەولێر بەدەستی برایەکی ئومێد سەباح سەرۆکی دیوانی ئەنجومەنی وەزیران بڵاوکردوەو پشتراستیکردەوە کە شەوی (٢٠٢٣/٤/١٨) سەعات (٩)ی شەو ڕووداوێکی کوشتن روویدا لە شەقامی (١٢٠) مەتری شاری ھەولێر وە تۆمەتبار (م.ص.ع)لەھەمان کاتدا خۆی ڕادەستی یاسا کرد وە بەپێی یاسا مامەڵەی لەگەڵ دەکرێت.

هێزە ئەمنییەکانی هەولێر ویستیان بابەتەکە پەردەپۆشبکەن

پەرلەمانتارەکەی لیژنەی ناوخۆ لەبارەی راگەیەنراوەکەی بەرێوەبەرایەتی پۆلیسی هەولێرەوە وتی:"سەرەتا هێزە ئەمنییەکانی هەولێر ویستیان ئەو بابەتە بە نهێنی بهێڵنەوە بەڵگەش بۆ ئەو قسەیەم ئەوەیە کە پاش بڵاوبوونەوەی رووداوەکە لە کەناڵەکانی راگەیاندن، دواتر روونکردنەوەیدا بۆیە بەبۆچونی من ئەگەر کەناڵەکانی راگەیاندن نەبوونایە وەک چەندین رووداوی دیکە ئەو رووداوەشیان پەردەپۆشدەکرد.

هاووڵاتیانی هەولێر و دهۆک بەدەست ئەو سیاسەتە چەوتەی پارتییەوە دەناڵێنن و کەسیان خاوەنی گیانی خۆیان نین، بەهیچ شێوەیەک یاسا بەرقەرار نییە و حزب لەبری یاساو دادگا بڕیاردەدات و کێیان بوێت زیندانی دەکەن، کێیان بوێت دەیکوژن، کێشیان بوێت و ئەتکیدەکەن و سووکایەتی پێدەکەن، ئەنجامەکەشی باش نابێت بۆ پارتی.

PUKMEDIA