سەرۆک بافڵ: هەندێک ناوچە بۆتە زیندانی دەنگە ئازادەکان

نوسینگەی رۆژنامەوانی سەرۆکی یەکێتی

بافڵ جەلال تاڵەبانی سەرۆکی یەکێتیی نیشتمانیی کوردستان

بافڵ جەلال تاڵەبانی سەرۆکی یەکێتیی نیشتمانیی کوردستان لە ساڵیادی رۆژنامەگەری کوردی دا، پیرۆزبایی لە رۆژنامەنووسانی کوردستان دەکات و هیوای بەردەوامییان بۆدەخوازێت و راشیدەگەیەنێت، "لە ساڵانی رابردوودا هەندێک ناوچەی هەرێمی کوردستان بووەتە جێگەیەک بۆ کپکردن و زیندانیکردنی دەنگە ئازادەکان".

دەقی پەیامەکەی سەرۆک بافڵ

ساڵیادی رۆژنامەگەریی کوردی لە رۆژنامەنووسانی کوردستان پیرۆزبێت و هیوای بەردەوامی و سەرکەوتنیان بۆ دەخوازم.

راستییەکی حاشاهەڵنەگرە رۆژنامەگەریی ئازاد و فەراهەمکردنی ئازادیی بیروڕا پایەیەکی گرنگی دیموکراسین و هێمای گەشەسەندن و پێشکەوتنی وڵاتە. بەڵام بەداخەوە لە ساڵانی رابردوودا هەندێک ناوچەی هەرێمی کوردستان نەک تەنیا لەو رووەوە گەشەی نەکردووە، بەڵکو بووەتە جێگەیەک بۆ کپکردن و زیندانیکردنی دەنگە ئازادەکان. تۆمەتی ناڕەوا بۆ رۆژنامەنووسان دروستدەکرێت و وێنەیەکی نەخوازراوی هەرێم پێشکەشی کۆمەڵگەی نێودەوڵەتی دەکرێت.

ئێمە باوەڕی تەواومان بە رۆژنامەگەری ئازاد و رۆژنامەنووسی بوێر هەیە. هەرگیزیش خۆمان لە سەروو رەخنەوە نەبینیووە و پشتیوانی هەر هەوڵێکیش دەکەین کە هەڵەکانمان دەستنیشان بکات و رێگا راستەکەمان نیشان بدات. بۆیە لەسەر هەمان ئەو بیروباوەڕە نەگۆڕەی خۆمان بەردەوام دەبین و هاوکار و هەماهەنگی میدیای پیشەیی و هەموو دەنگە دلێر و ئازادەکان دەبین.

بافڵ جەلال تاڵەبانی
سەرۆکی یەکێتیی نیشتمانیی کوردستان