قوباد تاڵەبانی لە دێڵفی: دەبێت پێداویستی ناوخۆمان پڕبکەینەوە پاشان غاز هەناردە بکەین

یۆنان

قوباد تاڵەبانی جێگری سەرۆکی حکومەتی هەرێم

قوباد تاڵەبانی جێگری سەرۆک وەزیرانی هەرێم لەمیانی بەشداریکردنی لەکۆڕبەندی ئابووری دێڵفی لەیۆنان لە وتارێکدا رایگەیاند:" لەڕووی جیۆپۆلتیکەوە، کوردستان لەدۆخێکی ئاڵۆزدایەو دەبێت بە حەکیمی مامەڵە لەگەڵ دراوسێکانمان بکەین، پێویستە پەیوەندیی باشمان لەگەڵ هەموو لایەنەکان هەبێت".وتیشی:" لەگەڵ ئەوەی هەرێم دەوڵەمەندە بە سامانی سروشتی، بەڵام بەداخەوە هێشتا کارەبای ٢٤ سەعاتیمان نییە، بۆیە دەبێت ئەو گرفتە چارەسەر بکەین و پێداویستییە ناوخۆییەکان پڕ بکەینەوە ئینجا بیر لە هەناردەکردنی غاز بکەین".

قوباد تاڵەبانی جێگری سەرۆک وەزیرانی هەرێم بۆ دووەم جار لەسەریەک بەشداری کرد لە کۆربەندنی ئابوری دێڵفی لەیۆنان و لە وتارێکیشیدا لە کۆربەندەکەدا کە رۆژی ٢٧-٤-٢٠٢٣ پێشکەشیکرد رایگەیاند:" سەرچاوە سروشتییەکان وادەکەن حکومەت تەمەڵ بێت، پێویستە خزمەتگوزاری باش پێشکەشی گەلەکەمان بکەین".

جگە لە داهاتی نەوت پشت بە داهاتی تریش ببەستین

هەر لە وتارەکەدا قوباد تاڵەبانی وتیشی:"ئێمە پێویستییەکی زۆری ناوخۆییمان بۆ وزە هەیە، سەرچاوەیەکی زۆرمان لە غاز هەیە کە تا ئێستا دەرنەهێنراون، کۆی سەرچاوەی داهاتی ئێمە پشت بە نەوت دەبەستێت و پێویستە ژیرانە رەفتار بکەین بۆ هەمەجۆرکردنی سەرچاوەکانی داهات"، راشیگەیاند:" پشتبەستن بە نەوت و سەرچاوە سروشتییەکانی تر ئابورییەکی سەقامگیرمان بۆ دەستەبەر ناکات، بۆیە دەبێت پشت بە سەرچاوەی داهاتی تر ببەستین، بۆیە لێرەین بۆ ئەوەی سود لە ئەزموونی یۆنان و وڵاتانی تر وەربگرین".

شەفافیەت هەبێت گەندەلی قورس دەبێت

وتیشی:" کارمان لەسەر حکومەتێکی ئەلیکترۆنی کردووە، ئەگەر شەفافیەت هەبێت گەندەلی قورس دەبێت، چونکە حکومەتێکی بیرۆکراسی  وادەکات گەندەڵی بڵاوببێتەوە".

ژنان دەتوانن رۆڵێکی باش لە حکومەتدا بگێڕن

راشیگەیاند:" یەکسانی نێوان ژن و پیاو لە کوردستان شتێکە باوەرمان پێیەتی ژنان دەتوانن رۆڵێکی باش لە حکومەتدا بگێڕن".

 پەیوەندییەکانمان لەگەڵ وڵاتان پتەوتربکەین

قوباد تاڵەبانی لە درێژەی وتارەکەیدا وتیشی:"پەیوەندی باشمان لەگەڵ ئیدارەی ئەمریکا هەیە، هاوکات دژی ئێران و تورکیا نین، پویستە پەیوەندییەکانمان لەگەڵ وڵاتان پتەوتربکەین".

راشیگەیاند:"پەیوەندیمان لەگەڵ کوردانی سوریاش هەیە و پێکەوە شەڕمان لەگەڵ داعش کردووە".

PUKMEDIA