پلاسخارت لە هەولێر: بەتۆقاندن و هەڕەشە بۆچوونە جیاوازەكان سەركوت دەكرێن

ئاژانسەكان

جێنین پلاسخارت نوێنەری تایبەتی نەتەوە یەكگرتووەكان لە عیراق

جێنین پلاسخارت، نوێنەری تایبەتی نەتەوە یەكگرتووەكان لە عیراق  لە ئیڤنتێكدا لە هەولێر رەخنە لە بەرتەسككردنەوەی ئازادییەكان دەگرێت و دەڵێت: "دۆخی ئەمڕۆی ئازادی رادەربڕین جێگەی نیگەرانییە"، دەشڵێت: "بەكارهێنانی ئامرازی جۆراوجۆر بۆ دامركاندنەوەی ناڕەزایەتییەكان زیادبوون".  

قسەكانی نوێنەری تایبەتی نەتەوەیەكگرتووەكان لە عیراق لە كاتێكدایە رۆژانە دەیان راپۆرتی نێودەوڵەتی لەسەر پێشێلكردنی مافەكانی مرۆڤ و بەرتەسككردنەوەی ئازادییەكان بڵاودەكرێنەوە و كابینەی نۆی حكومەتی هەرێمی كوردستان بە بەرپرسیار دەزانن لەو رووەوە، ئەوەش وایكردووە رووی هەرێمی كوردستان بەرامبەر بە كۆمەڵی نێودەوڵەتی ناشرین بێت، بەتایبەت كە لە سنووری هەولێر و بادینان بەشێوەیەكی بەرچاو ئازادییەكان بەرتەسككراونتەوە و دەیان رۆژنامەنووس و چالاكوانی كۆمەڵی مەدەنی لە زیندانەكاندان و پێشوەختەو پێش بڕیاری دادگای بێ‌ لایەن تۆمەتیان خراوەتە پاڵ.

هەرچەندە بەردەوام وڵاتان و نەتەوەیەكگرتووەكان هۆشداری لەو دۆخە نەخوازراوەی هەرێم دەدەن كەلەلایەن كابینەی نۆی حكومەتەوە خوڵقێندراوە، بەڵام حكومەت بەسەرۆكایەتی مەسرور بازانی ئەو هۆشداری و راپۆرتە پشتگوێ‌ دەخات و لەبری بەخۆداچوونەوە تۆمەتیش بۆ نێردە و نوێنەری وڵاتان دروست دەكات.

لە هەموو دیداو ئیڤێنتەكان نێردەو نوێنەری وڵاتان و نەتەوەیەكگرتووەكان تەئكید لە ئازادی رادەبڕین دەكەنەوە، لە نوێترین لێدوانیشدا جێنین پلاسخارت، نوێنەری تایبەتی نەتەوە یەكگرتووەكان لە عیراق  دەڵێت: "بۆ خزمەتكردنی هەموو هاووڵاتیان بە باشترین شێوە، زۆر گرنگە كە كۆمەڵێك دەنگی جیاواز ببیسترێن". تەئكیدیش لە گرنگی ئازادی رادەبڕین دەكاتەوەو دەڵێت:  "ئازادی رادەربرێن گرنگە".

ئازادی رادەبڕین لە سنووری هەولێر و بادینان بەشێوەیەكی بەرچاو بەرەو ولاوازبوون دەچێت و بەردەوام رێگری لە خۆپیشاندانی مەدەنیانە دەكرێت، لەو بارەیەوە نوێنەرەكەی نەتەوەیەكگرتووەكان دەڵێت: "بێدەنگكردن یان رێگریكردن یان رەتكردنەوە یان بچووككردنەوەی گوتاری گشتی تەنیا دوو شت بەدەست دەهێنێت: هەم وێنەی دەوڵەت لەكەدار دەكات و هەمیش متمانەی خەڵك لەدەست دەدات".

دەشڵێت: "راگەیاندنی ئازاد یەكێكی ترە لە بزوێنەرە بەهێزەكانی پەروەردە و فێربوون،   ئازادی رادەربڕین وەك پایەیەكی بنەڕەتی هەر كۆمەڵگایەكی دیموكراسی، واقیعی ئەمڕۆ جێگەی نیگەرانییە، لە سەرانسەری وڵاتدا  بەرەو زیادبوونیش دەچێت بەكارهێنانی ئامرازی جۆراوجۆری یاسایی و كارگێڕی و ئامرازی تری بەڕواڵەت یاسایی دەبینین بۆ دامركاندنەوەی ناڕەزایەتییەكان یان خراپتر. ئەوەش ئاشكرا دەكات كە توندوتیژی و تۆقاندن و هەڕەشەكردن هەیە بۆ سەركوتكردنی ئەو بۆچوونانەی كە جیاوازن، هۆشداریش لەوەدات كە كاتێك یاساكان بەكاردەهێنرێن، نەك بۆ پاراستن، بەڵكو بۆ بێدەنگكردن، ئەوا بیروڕای ئازاد دەكەوێتە ژێر هەڕەشەیەكی گەورەوە".

PUKMEDIA