مەکتەبی سیاسی: ئازا بێت میدیا و ئازاد بن رۆژنامەنووسان

PUKMEDIA

یەکێتیی نیشتمانیی کوردستان

مەکتەبی سیاسی یەکێتیی نیشتمانیی کوردستان لە 3ی ئایار رۆژی هەڵوەستەکردن لەسەر دۆخی میدیایی و ئازادییەکانی رۆژنامەگەریدا لە پەیامێکدا دەڵێت: "هەرێمی کوردستان وێنەیەکی خراپی بەخشیوەو داوا لە کابینەی نۆ کراوە ئەم بارە لارە راست بکەنەوە  و دەرفەتی گونجاو  برەخسێنن  بۆ ئازادی رادەربڕین و دەرگای بە دەستهێنانی زانیاری و  فراوانکردنی مەودای  کارکردنی میدیاکاران و رۆژنامەنوسان  واڵا بکەن".

دەقە پەیامەکە...

3ی ئایاری هەموو ساڵێک لە لایەن رێکخراوی نەتەوە یەکگرتوەکانەوە بۆ هەڵوەستەکردن لە سەر دۆخی میدیایی و ئازادییەکانی رۆژنامەگەری و ڕا دەربڕین  دیاری کراوە .

بە پێی راپۆرتی رێکخراوەکانی تایبەت بە مافەکانی مرۆڤ و چاودێری میدیایی ناوەند و نێردە ديپلۆماسییەکان، ئەوەی پەیوەندی بە هەرێمی کوردستانەوەیە بە داخەوە لەم بوارەدا وێنەیەکی خراپی بەخشیووە. چەندینجار هۆشداری دراوە بە کابینەی نۆیەمی حکومەتی هەرێم کە ئەم بارە لارە راست بکەنەوە و دەرفەتی گونجاو بڕەخسێنن بۆ ئازادی رادەربڕین و دەرگای بە دەستهێنانی زانیاری و فراوانکردنی مەودای کارکردنی میدیاکاران و رۆژنامەنووسان  واڵا بکەن .

لەو رەخنە وگلەییانەی رێکخراوە جیهانیيەکان لەسەر ئەم پرسە لە هەرێمی کوردستان بەرامبەر رۆژنامەنووسان و میدیاکاران هەیانە، داتاشینی ئەو تۆمەتە ناڕاستانەیە کە بۆیان دروست دەکرێت لەسەر وشە و هەواڵی راستی و  بەو بیانوەوە روبەڕوی گرتن و  راوەدونانیان دەکەنەوە .

لەم بۆنە جیهانیيەدا لە درێژەى باوەڕبوونمان بەدیموکراسی و رادەربِين بۆ خستنەڕووی راستییەکان و هەقبێژیی لە گشت بوارەکانی میدیای و نووسیندا، هەمیشە پێداگیری لە فراوانکردنی مەودای ئازادییەکان و زەمینە رەخساندنی زیاتر دەکەینەوە  و خەباتمان بۆ  نەهێشتنی بەرتەسککردنەوە و پێشێلکردنی ئەو مافانەی رۆژنامەنووسان و میدیا کارانە لە کوردستاندا .

راگەیاندنی مەکتەبی سیاسیی 
یەکێتیی نیشتمانیی کوردستان

PUKMEDIA