لەسەر داوای یەكێتی خوێندنەوەی دووەم بۆ پڕۆرژەیاسای بە پارێزگابوونی ھەڵەبجە دەكرێت

PUKMEDIA

ئەنجومەنی نوێنەرانی عیراق

سبەینێ پێنج شەممە، ئەنجومەنی نوێنەرانی عیراق كۆدەبێتەوە و لەسەر داوای فراكسیۆنی یەكێتیش خوێندنەوەی دووەم بۆ پڕۆرژەیاسای بە پارێزگابوونی ھەڵەبجە دەخرێتە بەرنامەی كارەوە.

د. بڕیار رەشید ئەندامی ئەنجومەنی نوێنەرانی عیراق بە سایتی رەسمی یەكێتیی نیشتمانیی كوردستان PUKMEDIA ی راگەیاند: "لەسەر داواكاری فراكسیۆنی یەكێتی لەئەنجوومەنی نوێنەرانی عیراق، سبەینێ خوێندنەوەی دووهەم و كۆتایی بۆ پڕۆژە یاسای بە پارێزگابوونی هەڵەبجە خرایە نێو خشتەی دانیشتنی ئەنجوومەنی نوێنەرانی عیراقەوە" .

راشیگەیاند: "بەگوێرەی فەرمانگەی راگەیاندنی ئەنجومەنی نوێنەرانی عیراق، بەرنامەی كاری كۆبوونەوەكەی سبەینێ سەرەتا لە شەش تەوەر پێكھاتبوو كەبریتیبوون  لە دەنگدان، خوێندنەوەی یەكەم و دووەم بۆ چەند پڕۆژە یاسایەك، بەڵام لەسەر داوای فراكسیۆنی یەكێتی لە ئەنجومەنی نوێنەرانی عیراق، تەوەری حەوتەمیش بۆ بەرنامەی كارەكە زیاد كرا كە بریتییە لە خوێندنەوەی دووەم و گفتوگۆ، راپۆرتی لیژنەی ھەرێم و پارێزگاكان تایبەت بە پڕۆژەیاسای بە پارێزگابوونی ھەڵەبجە".

جێی ئاماژەیە لە دانیشتنی شەوی 16-4-2023ی ئەنجومەنی نوێنەرانی عیراقدا، فراكسیۆنی یەكێتیی نیشتمانیی كوردستان ئیمزای بۆ زیادكردنی بەشەبودجەیەكی تایبەت بۆ پارێزگایی هەڵەبجە و خوێندنەوەی دووهەمی پڕۆژە یاسای زیادكردنی پارێزگایی هەڵەبجە لە عیراق بۆ دانیشتنی داهاتووی ئەنجوومەنی نوێنەران كۆكردەوە.

PUKMEDIA