وتەبێژی یەکێتی: ئامادەین بۆ هەڵبژاردن

PUKMEDIA

د. سۆران جەمال تاهیر وتەبێژی یەکێتی

د. سۆران جەمال تاهیر وتەبێژی یەكێتیی نیشتیمانیی كوردستان رایگەیاند، "یەکێتی ئامادەیە بۆ هەڵبژاردن و لەپێناو پاراستنی شكۆ و پێگەی هەرێمی كوردستان پێویستە هەڵبژاردن لەکاتی خۆیدا ئەنجام بدرێت".

هەوڵەکانی یەکێتی بۆ ئەنجامدانی هەڵبژاردنە

د. سۆران جەمال تاهیر وتەبێژی یەکێتیی نیشتمانیی کوردستان بە میدیای یەکێتی رایگەیاند: "یەکێتیی نیشتمانیی کوردستان ئامادەیە بۆ هەڵبژاردن و هەڵبژاردنیش پێویستی بە چەند بنەمایەکی سەرەکی هەیە وەکو هەمواری یاسای هەڵبژاردن و کاراکردنەوەی کۆمسیۆنی باڵای هەڵبژاردن".
"هەوڵەکانمان بەو ئاڕاستە بووە کە یاسای هەڵبژاردنی هەرێمی کوردستان هەموار بکرێتەوە، خەڵکی هەرێمی کوردستان و لایەنە سیاسییەکانیش لەگەڵ ئەوەن کە یاسایەکی نوێ بۆ هەڵبژاردن هەبێت، لەبەرئەوەی ئەو یاسایە کە هەڵبژاردنی پێکراوە لە پێنج خولی رابردوودا، لە ساڵی 1992 دانراوە و چەندینجار هەموارکراوەتەوە"، وتەبێژی یەکێتی وادەڵێت.

پێکهاتەکان نوێنەری راستەقینەی خۆیان هەبێت

وتەبێژی یەکێتی ئاماژەی بەوەداوە: "یەکێتیی نیشتمانیی کوردستان لەگەڵ ئەوەدایە کە پێکهاتەکانی هەرێمی کوردستان رێژەی خۆیان پارێزراوبێت و نوێنەرایەتی ئەو پێکهاتانە بکەن کە دەنگیان پیدەدەن".
"رۆژی ١٨-١١-٢-٢٣ دیاریکراوە بۆ رۆژی هەڵبژاردن، کاتێکی زۆرمان لەبەردەستدا ماوە و گەر لایەنی بەرامبەرمان ئامادەبێت لە کۆبوونەوەیەکدا دەتوانین لەسەر خاڵە سەرەکییەکانی هەڵبژاردن کۆک بین و ئەوکاتەی رێککەوتنی لایەنە سیاسییەکانی لەسەر کرا دەتوانین لە ماوەی هەفتەیەک تا دوو هەفتە لە پەرلەمانی کوردستان دا ئەو یاسایە هەمواربکرێتەوە و کۆمسیۆنی باڵای هەڵبژاردنەکان کارابکرێتەوە، بەڵام ئەمانە پێویستیان بە رێککەوتن هەیە"، د. سۆران وادەڵێت.
باس لەوەش دەکات: "لەپێناو پاراستنی شكۆ و پێگەی هەرێمی كوردستان، پێویستە سەرجەم لایەنەكان رێبكەون و گوێ لە سەرنج و داواكاری یەكتر بگرن، تا هەڵبژاردن لەوادەی خۆیدا و بەشیوەیەكی دیموكراسیانە بەڕێوەبچێت".
PUKMEDIA