قوباد تاڵەبانی: یەكێتی مامۆستایان خاوەنی مێژوویەكی پڕ شانازییە

PUKMEDIA

قوباد تاڵەبانی جێگری سەرۆكی ئەنجومەنی وەزیران

بەبۆنەی یادی دامەزراندنی یەكێتی مامۆستایانی كوردستانەوە قوباد تاڵەبانی جێگری سەرۆكی ئەنجومەنی وەزیران، پەیامێكی پیرۆزبایی ئاڕاستەی یەكێتییەكە و مامۆستایانی كوردستان دەكات و رایدەگەیەنێت: "یەكێتی مامۆستایان خاوەنی مێژوویەكی پڕ لە شانازییە و رۆڵی گرنگی لە خەباتی رزگاریخوازانەی گەلەكەماندا هەبووە".

دەقی پەیامەكە:


*بەڕێزان سەرۆك و ئەندامانی سكرتاریەتی یەكێتی مامۆستایانی كوردستان*

بەبۆنەی یادی دامەزراندنی یەكێتی مامۆستایانی كوردستانەوە گەرمترین پیرۆزبایی ئاڕاستەی ئێوە و هەموو مامۆستایانی كوردستان دەكەم.

یەكێتی مامۆستایان خاوەنی مێژوویەكی پڕ لە شانازییە، چ وەك بەشداریكردن و رۆڵی گرنگی لە خەباتی رزگاریخوازانەی گەلەكەماندا و چ وەك ئەركی پیشەیی خۆی لە پەروەردەكردنی چەندین نەوە و داكۆكیكردن لە مافی مامۆستایاندا.

گومانی تێدانییە كە ئەركی یەكێتی مامۆستایان لەم قۆناغەدا قورسترە لە هەر قۆناغێكی دیكە، بەوپێیەی داهاتووی وڵاتەكەمان بەندە بە پەروەردەكردنی نەوەیەكی زانستخوازی نیشتمانپەروەرە و بۆ ئەمەش پێویستە یەكێتی مامۆستایان رۆڵی كارا ببینێت لە پێداچوونەوە بە سیستمی پەروەردە و گەشەپێدانی زیاتری پەروەردەی كوردستان.


جارێكی دیكە پیرۆزبایی لە هەموو مامۆستایانی كوردستان دەكەم و هیوای سەركەوتنی زیاتر بۆ رێكخراوەكەتان دەخوازم.

قوباد تاڵەبانی
جێگری سەرۆكی ئەنجومەنی وەزیران

PUKMEDIA