خانمی یه‌كه‌می عیراق: ئاماده‌ی هاوكارین بۆ سه‌روه‌ریی دادگا

نووسینگەی خانمی یه‌كه‌می عیراق

خانمی یه‌كه‌می عيراق سه‌ردانی دادگای سلێمانی كرد

ئه‌مڕ‌ۆ سێ شه‌ممه‌ 16-5-2023، خاتوو شاناز ئیبراهیم ئه‌حمه‌د خانمی یه‌كه‌می عيراق سه‌ردانی دادگای سلێمانی كرد و له‌لایه‌ن دادوه‌ر جاسم جزا‌و جافر هه‌ورامی سه‌رۆكی دادگای تێھه‌ڵچونه‌وه‌ی ناوچه‌ی سلێمانی پێشوازی لێكرا. 

مه‌به‌ستی سه‌ره‌كی سه‌ردانه‌كه‌ بۆ پاڵپشتی ده‌زگای دادوه‌ری و جه‌ختكردنه‌وه‌ بوو له‌ سه‌روه‌ریی و سه‌ربه‌خۆیی ده‌سه‌ڵاتی دادوه‌ری و ئاگاداربوون له‌چۆنيیه‌تی ئیشوكاره‌كان وه‌ك خانمی یه‌كه‌م و دامه‌زراوه‌ی سه‌رۆكایه‌تی كۆماری عیراق.
  
له‌ دیدارێكدا كه‌ جێگرانی سه‌رۆكی دادگا ئاماده‌یبوون، باس له‌ دۆخی دادگا و دامه‌زراوه‌ دادوه‌رییه‌كانی كوردستان به‌گشتی و پارێزگای سلێمانی به‌تایبه‌تی كرا.

سه‌رۆكی دادگا باسی له‌كێشه‌و گرفته‌كانی به‌رده‌م به‌رێوه‌چوونی كاره‌كانی دادگا كرد كه‌ هۆكارن بۆ كه‌ڵه‌كه‌بوونی داواكان و دره‌نگ یه‌كلابونه‌وه‌یان، كه‌ گرنگترینیان كه‌می ژماره‌ی دادوه‌ر و لێكۆڵه‌ری دادوه‌ری و فه‌رمانبه‌ر و كه‌می بودجه‌ی دادگاكانه‌.
  
له‌ به‌رامبه‌ردا، خانمی یه‌كه‌می عیراق باسی گرنگی رۆڵی دادگاكانی كرد له‌ پاراستنی ئاسایشی كۆمه‌ڵایه‌تی و كه‌مكردنه‌وه‌ی توندوتیژی و تاوانه‌كان و گێڕ‌انه‌وه‌ی ماف بۆ خاوه‌نه‌كه‌ی، هه‌روه‌ها ڕ‌ایگه‌یاند": ئاماده‌ی هه‌ر هاوكاری و هه‌ماهه‌نگییه‌كن كه‌ خزمه‌ت بێت به‌سه‌روه‌ریی دادگا و جێبه‌جێكردنی بڕ‌یاره‌كانی و پاڵپشتی بێت بۆ سه‌ربه‌خۆیی دامه‌زراوه‌ دادوه‌رییه‌كان". 

PUKMEDIA