رەفعەت عەبدوڵا: یەكێتی ماڵی هەموو تێكۆشەرێكە

PUKMEDIA

کۆبوونەوەکەی بڕیاردەری مەكتەبی سیاسی

رەفعەت عەبدوڵا بڕیاردەری دەستەی كارگێڕی مەكتەبی سیاسیی یەكێتیی نیشتمانیی كوردستان رایدەگەیەنێت: "یەكێتی كەسی لێ زیاد نییە و ماڵی هەموو تێكۆشەرێكە، پێویستە هەوڵەكانمان بخەینەكار بۆ ئاشتركردنەوەی ئەو تێكۆشەر و كادرانە کە بەهەر جۆرێك بێت نیگەرانن"، ئاشكراشیكرد: "ئەمساڵ  یادێكی شایستەی دامەزراندنی ی.ن.ك دەكەینەوە".

ئەم وتانەی بڕیاردەری مەكتەبی سیاسی لە میانی كۆبوونەوەیەكیدا بوو کە بە ئامادەبوونی سەركەوت زەكی لێپرسراوی مەكتەبی رێكخستن لەگەڵ لێپرسراوی مەڵبەند و بۆردەكان و ئەندامانی مەكتەبی رێكخستن  بەرێوەچوو.

لە كۆبوونەوەكەدا كە رۆژی 17/5 بەڕێوەچوو، هەڤاڵ رەفعەت عەبدوڵا لە وتەیەكدا و باسی لە رۆژی شەهیدانی باڵەكایەتی و رۆڵی شەهیدی سەركردە حەسەن كوێستانی كرد كە ئەمڕۆ ساڵیادی شەهیدبوونیەتی و رایگەیاند: "شەهیدی سەركردە تێكۆشەرێكی دیار و بوێر بووە و رۆڵ و كاریگەری دیاری هەبوو لەمێژووی خەباتی كورد و یەكێتی نیشتمانیدا".

بڕیاردەری دەستەی كارگێڕی باسی لەپەیوەندییەكانی یەكێتیی نیشتمانی كرد و وتیشی: "یەكێتی پەیوەندیەكی باشی هەیە لەگەڵ لایەنە كوردستانی و عیراقیەكاندا و لایەنێكی سەرەكی و كاریگەرە لەپرۆسەی سیاسیدا عیراقدا، هەروەها لەبڕیارە چارەنوسسازەكاندا پێگەیەكی بەهێزمان هەیە". هەروەك ئاماژەی بە پەیوەندییە دیپلۆماسییەكانی یەكێتییش كرد لەگەڵ وڵاتان و ناوەندە سیاسییەكان كە لەئاستیكی باشدایە.

سەبارەت بە كاری رێكخراوەیی و ئۆرگانیش هەڤاڵ رەفعەت ئاماژەی بەوەکرد: "پێویستە هەموو هەوڵەكانمان بخەینەكار بۆ ئاشتركردنەوەی ئەو تێكۆشەر و كادرانەی بەهەر جۆرێك بێت نیگەرانن، چونكە یەكێتی كەسی لێزیاد نییە و ماڵی هەموو تێكۆشەرێكە".

تەوەرێكی ئەو كۆبوونەوەیە تایبەت بوو بە ساڵیادی دامەزراندنی یەكێتیی نیشتمانیی كوردستان، لەو بارەوە بڕیاردەری دەستەی كارگێڕی مەكتەبی سیاسیی رایگەیاند: "پێویستە یادێكی پڕ شایستە بكەینەوە و ئەمساڵ بكەینە دەرفەتێك بۆ ئاشتكردنەوەی زیاتری كۆمەڵانی خەڵك، بین داكۆكی لە  باشتركردنی ژیان و گوزەرانی خەڵك بكەین، لەرێگەی تیمی یەكێتی لەحكومەت".
PUKMEDIA