خوێندنگەی بنەڕەتی رەوەند جەبار فەرمان دەكرێتەوە

PUKMEDIA

خوێندنگەی بنەڕەتی رەوەند جەبار فەرمان دەكرێتەوە

ئەمڕۆ 21-5-2023، لەمەڕاسیمێكدا بەئامادەبوونی جەماوەرێكی زۆری سنووری گەرمیان و سەرپەرشتیاری ئیدارەی گەرمیان و لێپرسراوانی حزبی و حكومی، خوێندنگەی دوانزە پۆلی بنەڕەتی (رەوەند جەبار فەرمان) كرایەوە و بەتەواوی پێداویستیەكانییەوە پێشكەش بەبەڕێوەبەرایەتی گشتی پەروەردەی گەرمیان كرا.

خوێندنگەكە لەسەر ئەركی خانەوادەی سەركردەی كۆچكردوو جەبار فەرمان دروستكراوە، ئەمەش دوای ئەوە دێت، ئەم خانەوادەیە لە سنووری پەروردەی گەرمیاندا سێ باخچەی مناڵانیان دروستكردووە.

 جەلال شێخ نوری سەرپەرشتیاری ئیدارەی گەرمیان لەوتەیەكیدا سوپاسی خانەوادەی سەركردەی كۆچكردوو جەبار فەرمانی كرد، كە بە دروستكردنی ئەم خوێندنگەیە و سێ باخچەی مناڵان رۆڵیان هەبووە لەگەشەپێدانی كەرتی پەروەردە لە سنووری گەرمیاندا، هاوكات تیشكی خستەسەر خەبات و رۆڵ و پێگەی گرنگی سەركردە جەبار فەرمان، لەشاخداوەك سەركردەیەكی لێهاتوو، هەروەها خزمەتەكانی لە دوای راپەڕینیش وەك وەزیر لە كابینەكانی حكومەتی هەرێم.

دوابەدوای ئەوەش، لەوتەیەكیدا سەبیحە خان خێزانی جەبار فەرمان، رایگەیاند: "ئێمە خۆمان بەقەرزاری گەرمیانییەكان دەزانین، لەو چوارچێوەیش بریارمانداوە وەك بنەماڵەی جەبار فەرمان لەرووی پەروەردەییەوە خزمەتی خۆمان بەم ناوچەیە بكەین، ئەویش لەچوارچێوەی دروستكردنی باخچەی ساوایان و خوێندنگە".

هاوكات دارا ئەحمەد بەڕێوەبەری گشتی پەروەردەی گەرمیان رایگەیاند: "بنەماڵەی جەبار فەرمان لەكەرتی پەروەردەدا خزمەتی باشیان بەگەرمیان كردووە و ئێمە رۆڵیان بەرز دەنرخێنین و بەدڵنیاییەوە ئەم خوێندنگەیە و سێ باخچەی دروستیان كردووە خزمەتی گەرورە بە كەرتی پەروەردە دەكەن لە سنوورەكە".

دواتر لە مەڕاسیمەكەدا، رێزلێنانی خانەوادەی جەبار فەرمان بەخشرایە هەریەكە لە بەڕێوەبەری گشتی پەروەردەی گەرمیان و بەڕێوەبەری پەروەردەی كەلار و سەرۆكی شارەوانی رزگاری لەبەرامبەر هاوكاری و هەماهەنگیان بۆ دروستكردنی قوتابخانە و باخچەی رەوەند جەبار فەرمان لە ناحیەی رزگاری".

هاوكات خەڵكێكی زۆر بەسوپاسی زۆرەوە پێشوازیان لەو دیاریە گرنگە كردو بەشداربوون لە مەراسیمی كردنەوەی قوتابخانەكە.

PUKMEDIA