سێ گەنج لە زاخۆوە گەیشتنە سەر مەزاری مام

PUKMEDIA

سەر مەزاری سەرۆک مام جەلال

بەبۆنەی یادی دامەزراندنی یەکێتیی نیشتمانیی کوردستانەوە دوای چەند رۆژێک بەڕێکەوتن بەیانی ئەمڕۆ سێ گەنجی ئیدارەی سەربەخۆی زاخۆ گەیشتنە سەر مەزاری مام و لەلایەن د. محەمەد سابیر سەرۆکی دامەزراوەی سەرۆک جەلال تاڵەبانی و سکرتاریەتی هەڤاڵ مام جەلال و جەزای سەید مەجید لێپرسراوی مەڵبەندی سلێمانی و ژمارەیەک کادری یەکێتییەوە پیشوازییان لێکرا.

یەکێک لەو گەنجانەی کەلە زاخۆوە بەپێ بەڕێ کەوتبوو بۆ سەر مەزاری مام بە سایتی رەسمی یەکێتیی نیشتمانیی کوردستان PUKMEDIA ی راگەیاند: "10ی مانگ ئێمە لە زاخۆوە بەڕێ کەوتین بۆسەر مەزاری مام و ئەمڕۆ لەگەڵ گەیشتنمان پێشوازییەکی گەرمیان لێکردین".

دەشڵێت: "لەگەڵ ئەوەی کەلەرێگا زەحمەتی زۆرمان کێشا بەڵام مام جەلال ئەو پیاوە سیاسەتمەدارە بوو کەجێی خۆی لە دڵی هەمومانا کردبوەوەو هەر کارێک لە پێناو مام بێت درێغی لێ ناکەین، هەروەها سوپاسی دامەزراوەی سەرۆک مام و مەڵبەندی سلێمانی و سکرتاریەتی مام دەکەین بۆ ئەو پێشوازییە گەرمەی کە لێیان کردین".

هەر لەو بارەیەوە د. محەمەد سابیر سەرۆکی دامەزراوەی سەرۆک جەلال تاڵەبانی دوای پێشوازی لەو سێ گەنجە رایگەیاند: "ئەوەی ئەم گەنجانە کردویانە دڵسۆزی و وەفایان بۆ سەرۆک مام جەلال و یەکێتیی نیشتمانیی کوردستان دەردەخات، کە رۆژی 1-6ی ئەمساڵ 47 ساڵ تێدەپەڕێت بەسەر یادی دامەزراندنی یەکێتیدا کە مام جەلال رۆڵی گەورەی بینیوە لە دامەزراندنیا".

"ماندووبونی ئەم گەنجانە بەرز دەنرخێنین و جێی رێزن و پێزانینمان هەیە بۆیان، بەو هیوایەین سەرجەم گەنجانی یەکێتی چاویان لێبکەن و تێبکۆشن بۆ بەدیهێنانی ئامانجەکانمان و ئەمان پەیامێک بن بۆ گەنجان"، د. محەمەد سابیر وای وت.

PUKMEDIA