فراكسیۆنی یەكێتی: ئێمە نەبووین بۆ پۆست و بەرژەوەندی حزبی یەكڕیزی بشكێنین

PUKMEDIA

لۆگۆی یەكێتیی نیشتمانیی كوردستان

سۆزان مەنسور وتەبێژی فراكسیۆنی یەكێتی لەئەنجومەنی نوێنەرانی عیراق لە راگەیەنراوێكدا ئاماژە بەوەدەكات: "هیچ كەس و لایەنێك مافی ئەوەی نییە پاراستنی هەرێمی كوردستان و بەرگریكردن لە مافی خەڵك بفرۆشێتەوە، چونكە ئەوە ئێمە نەبووین بۆ پۆست و بەرژەوەندی حزبی یەكڕیزی بشكێنین.

دەقی راگەیەنراوەكە:

ماوەی چەند رۆژێكە بەزمانێكی نەشیاو و نەگونجاو لەگەڵ پایە و سەنگی پەرلەمانتاری، فراكسیۆنی پارتی لە ئەنجومەنی نوێنەرانی عیراق بەیاننامە و لێدوان بڵاودەكەنەوەو دەیانەوێت خەڵكی كوردستان چەواشە بكەن خەریكی  موزایدەی سواون.

لەبەر بەرژەوەندی خەڵكی كوردستان و موراعاتكردنی هەستیاری دۆخەكە و سەرقاڵبوونمان بە چەسپاندنی داوا رەواكانی خەڵك لە بودجە، نەمانوویست وەڵامبدەینەوە و بچینە ئاستی ئەو زمانە نزم و نەشیاوەی ئەوان.

تەنها ئەوەندە دەڵێن، هیچ كەس و لایەنێك ناتوانێ لە مەسەلەی دیفاعكردن لە مافەكانی خەڵكی كوردستان لەبەغدا و پاراستنی هەرێمی كوردستان و پرسە نەتەوەیی و نیشتمانییەكاندا موزایدە بەسەر ئێمەوە بكات. 

هیچ هێزێكی كوردستانی هێندەی ئێمە پەرۆشی یەكڕیزی كوردستانی نەبووە لە بەغدا، ئەوە ئێمە نەبووین لەبەر پۆست ‌و بەرژەوەندی تەسكی حزبی یەكڕیزی بشكێنین.

  سەبارەت بەو ‌قسە بێسەروبەرانەی  لەسەر بەرێز قوباد تاڵەبانی دەكرێت،  گوایە پەیوەندی بە هەندێك پەرلەمانتاری عیراقەوە كردوە، ئەمە هیج بنەمایەكی نییە و هەڵبەستراوە، كاك قوباد تەنها پەیوەندی بەنوێنەری یەكێتی لە لیژنەی دارایی كردووە و رێنمایی كردووە كە بۆ چەسپاندنی شایستە داراییەكانی هەرێمی كوردستان هەوڵبدات. تەنها ئەوەندە دەڵێین: "كاتێك هەرێمی كوردستان لەبەردەم هەڕەشەی گەورەی قەیرانی داراییدا بوو، ئێوە گاڵتەتان بەڕێككەوتن لەگەڵ بەغدا دەهات و خەڵكی كوردستان بێ مووچە بوون، كاك قوباد (11) جار سەرۆكایەتی وەفدی دانوستانكاری هەرێمی كرد و (256) سەعات كۆبوونەوەی لەگەڵ لایەنە عیراقییەكاندا كرد و (50) رۆژ لە بەغدا مایەوە تا (200) ملیارەكە دەستەبەر بكات". 

لە كۆتاییدا رایدەگەیەنین رێگا راستەكە تەبایی و یەكڕیزی كوردستانی راستەقینەیە بۆ چارەسەركردنی كێشەكان، مەترسی راستەقینەش لەسەر هەرێم پەرتەوازەیی و ئاژاوەی سیاسی و گوتاری بوغرایی ئاست نزمی سیاسییە. 

وتەبێژی فراكسیۆنی یەكێتی 
لەئەنجومەنی نوێنەرانی عیراق

PUKMEDIA