‎سەرۆك بافڵ پێشوازی لە باوكی شەهید فەرماندە ئاكام دەكات

نووسینگەی سەرۆكی یەكێتی

بافڵ جەلال تاڵەبانی و باوكی شەهیدی فەرماندە ئاكام عومەر

بافڵ جەلال تاڵەبانی، سەرۆكی یەكێتیی نیشتمانیی كوردستان لە دەباشان پێشوازیكرد لە عومەر عوسمان، باوكی شەهیدی فەرماندە ئاكام عومەر، فەرماندەی فەرماندەیی هێزەكانی كۆماندۆی كوردستان.

‎لەدیدارەكەدا سەرۆك بافڵ جەلال تاڵەبانی لەنزیكەوە لە خانەوادەی شەهید ئاكامی پرسی و ستایشی خۆڕاگری و جوامێری خانەوادە سەربەرزەكەیانی كرد لە مێژووی خەباتی گەلەكەمان و رایگەیاند، ئێوە نموونەی قارەمانێتی و تێكۆشانن لەپێناو خاكەكەمان، شەهید ئاكامیش بەهەمان رۆحییەتەوە لەپێناو پاراستنی ژیانی خەڵك و ئارامیی هەرێمەكەمان خەباتی دەكرد و نموونەی قارەمانێتی لەمێژوودا نووسییەوە.

‎وتیشی، تێكشكاندنی ئەفسانەی داعش و رووبەڕووبوونەوەكانی لەپێناو پاراستنی كوردستاندا، شایەتی ئەو راستییە دەدەن.

‎لەبەرامبەردا عومەر عوسمان سوپاسی سەرۆك بافڵی كرد كە هەمیشە لەنزیكەوە لەگەڵ خانەوادەی شەهید ئاكام بووە و بەڵێنیدا درێژەپێدەری رێبازی شەهید ئاكام بن و رۆڵەیەكی بەئەمەكی كوردستان بن.

PUKMEDIA