پەیامی پیرۆزبایی قوباد تاڵەبانی بۆ دوو لە دەستەی دامەزرێنەرانی یەکێتی

PUKMEDIA

قوباد تاڵەبانی

قوباد تاڵەبانی لە ٤٨ هەمین ساڵیادی دامەزراندنی یەکێتیی نیشتمانیی کوردستاندا پیرۆزبایی لەهەردوو ئەندامی دەستەی دامەزرێنەری یەکێتی د. فوئاد مەعسوم و د. هۆمەر شێخموس دەکات و دەڵێت: "چەپکە گوڵی سوپاسگوزاری و پێزانینمان بۆ خەبات و تێکۆشانتان پێشکەش دەکەین".

قوباد تاڵەبانی سەرپەرشتیاری مەکتەبی سکرتاریەتی سەرۆک مام جەلال لەپیرۆزبایی نامەکەیدا بۆ د. فوئاد مەعسوم دەشڵێت: "بەشانازییەوە لەڕۆڵی بەڕێزتان دەڕوانین وەک کەسایەتیەکی سیاسی کوردستانی و عێراقی ناسراو، هاوڕێ و هاوخەباتی سەرۆک مام جەلال".

هاوکات لەپەیامەکەیدا بۆ د. هۆمەر شێخموس دەڵێت: "بەڕێزتان بە دڵسۆزی و سەربەرزی و کوردپەروەرانە تێکۆشان و تەمەنی خۆتان بەخشیوەتە مرۆڤایەتی بەگشتی و کوردایەتی بەتایبەت".

دەقی هەردوو پەیامەکەی قوباد تاڵەبانی...

*هەڤاڵ و برای بەڕێزمان، جەنابی کاك د. هۆمەر شێخموس، تێکۆشەری دێرین و ئەندامی دەستەی دامەزرێنەری یەکێتیی نیشتمانیی کوردستان*


لەیادی 48 هەمین ساڵڕۆژی دامەزراندنی یەکێتیی نیشتمانیی کوردستان، پیرۆزبایی گەرمتان ئاڕاستە دەکەم و چەپکە گوڵی سوپاسگوزاری و پێزانینمان بۆ خەبات و تێکۆشانتان پێشکەش دەکەین.

بەڕێزتان بە دڵسۆزی و سەربەرزی و کوردپەروەرانە تێکۆشان و تەمەنی خۆتان بەخشیوەتە مرۆڤایەتی بەگشتی و کوردایەتی بەتایبەت، هاوکات بە دانەبڕوای پشتیوان و هاوڕێ و هاوسەنگەری سەرۆک مام جەلال بوون. ئەم وەفادارییە کەم وێنەیەتان جێگەی تەقدیر و بەرز نرخاندنە.

ئێمە مێژووی پڕ لە سەروەری و سەربەرزیتان لەبیر ناکەین و بەردەوام دەبین تا کاروانەکەتان دەگەێنینە کەنارێکی ئارام و ئاوەدان. ئەرکمانە تێکۆشەرەکانی رێگای سەختی خەبات لە یاد نەکەین و لەسەر رێبازەکەیان بەردەوام بین.

تەمەنی ئێوە درێژبێت و تەندرووست و بەختەوەربن. درود بۆ گیانی پاکی شەهیدە نەمرەکان و تێکۆشەرەکانمان و پیرۆزە لەئێوە لە هەموو یەکێتییەکان ئەم یادە شکۆدارە.

*هەڤاڵ و برای بەڕێزمان، جەنابی کاك د. فوئاد معصوم، تێکۆشەری دێرین و ئەندامی دەستەی دامەزرێنەری یەکێتیی نیشتمانیی کوردستان*


لەیادی 48 هەمین ساڵڕۆژی دامەزراندنی یەکێتیی نیشتمانیی کوردستان، پیرۆزبایی گەرمتان ئاڕاستە دەکەم و چەپکە گوڵی سوپاسگوزاری و پێزانینمان بۆ خەبات و تێکۆشانتان پێشکەش دەکەین.

بەشانازییەوە لەڕۆڵی بەڕێزتان دەڕوانین وەک کەسایەتیەکی سیاسی کوردستانی و عێراقی ناسراو، هاوڕێ و هاوخەباتی سەرۆک مام جەلال، ئەزمونی دەوڵەمەندتان لەدەوڵەتداری هەمیشە نەخشەڕێگایە بۆمان بەتایبەت لە گرتنە ئەستۆی ئەرکی سەرۆکایەتی یەکەم کابینەی حکومەتی هەرێمی کوردستان  دواتریش لە پۆستی سەرۆک کۆماری عێراقدا.

ئێمە مێژووی پڕ لە سەروەری و سەربەرزیتان لەبیر ناکەین و بەردەوام دەبین تا کاروانەکەتان دەگەێنینە کەنارێکی ئارام. ئەرکمانە تێکۆشەرەکانی رێگای سەختی خەبات لە یاد نەکەین و لەسەر رێبازەکەیان بەردەوام بین.

تەمەنی ئێوە درێژبێت و تەندروست و بەختەوەربن. دروود بۆ گیانی پاکی شەهیدە نەمرەکان و تێکۆشەرەکانمان و پیرۆزە لەئێوە لە هەموو یەکێتییەکان ئەم یادە شکۆدارە.


قوباد تاڵەبانی
سەرپەرشتیاری مەکتەبی سکرتاریەتی سەرۆک مام جەلال
1/6/2023

PUKMEDIA