سەرۆك بافڵ دژەتیرۆر خەڵات دەكات

نووسینگەی سەرۆكی یەكێتی

‎بافڵ جەلال تاڵەبانی سەرۆكی یەكێتی و وەهاب هەڵەبجەیی بەڕێوەبەری گشتیی دژەتیرۆر

‎بافڵ جەلال تاڵەبانی، سەرۆكی یەكێتیی نیشتمانیی كوردستان لەگەڵ وەهاب هەڵەبجەیی، بەڕێوەبەری گشتیی دژەتیرۆر و ژمارەیەك لە فەرماندەكانی دژەتیرۆر كۆبووەوە.

‎لە سەرەتای كۆبوونەوەكەدا بەڕێوەبەری گشتیی دژەتیرۆر پلان و ستراتیژی هەواڵگری و سەربازیی داهاتووی بەڕێوەبەرایەتییەكەی بۆ پاراستنی هەرێم، روبەڕوبوونەوەی تیرۆر و هەماهەنگی لەگەڵ هێزە عیراقییەكان و هاوپەیمانان خستەڕوو و جەختی لە بەردەوامی ئۆپەراسیۆن و هەوڵەكانیان كردەوە بۆ پاراستنی سەقامگیریی ناوچەكە.

‎لە بەرامبەردا سەرۆك بافڵ جەلال تاڵەبانی سوپاس و پێزانینی ئاڕاستەی هێزەكانی دژەتیرۆر كرد وەك یەكەم هێزی دژەتیرۆر لە كوردستان و هەوڵەكانیان لەپێناو روبەڕوبوونەوەی تیرۆریستان و شكستپێهێنانی چەندین پیلان بۆ تێكدانی ئاسایشی هەرێم. 

وتیشی: "ئێوە نموونەی فەرماندەی دڵسۆز و بەئەمەكی كوردستانن و مێژوویەكی پڕ لە شانازیتان تۆماركردووە، چالاكییەكانتان لەپێناو پاراستنی سەقامگیریی هەرێم و خەڵكە خۆشەویستەكەی، گەواهیدەری دڵسۆزی و ماندوونەناسیی ئێوەیە".


‎سەرۆك بافڵ راشیگەیاند: "لەگەڵ هاوپەیمانەكانمان لە هەوڵی بەردەوامدا دەبین تاوەكو هێزەكانی دژەتیرۆر فراوانتر و بەهێزتر بكرێت تاوەكو قەڵغانێكی پتەوتر بن بۆ پاراستنی كوردستان".


‎لەكۆتایی كۆبوونەوەكەدا سەرۆكی یەكێتی خەڵاتی رێزلێنانی پێشكەشی بەڕێوەبەرایەتی دژەتیرۆر كرد لەبەرامبەر هەوڵ و قوربانیدانەكانیان لەپێناو خاكی كوردستان و سەرفرازیی خەڵكەكەیدا.

PUKMEDIA