سەرۆک بافڵ: چیتر ژیان و قووتی خەڵک شەڕی سیاسی پێوەناکرێت

نوسینگەی رۆژنامەوانی بافڵ جەلال تاڵەبانی

بافڵ جەلال تاڵەبانی

‌‎بافڵ جەلال تاڵەبانی، سەرۆکی یەکێتیی نیشتمانیی کوردستان لە بارەگای مەکتەبی سیاسی لە هەولێر پێشوازیکرد لە میکێلێ کامێرۆتا، کونسوڵی گشتیی ئیتاڵیا لە هەرێمی كوردستان.


‌‎لە دیدارێکدا كە دەرباز کۆسرەت رەسوڵ، کارگێڕی مەکتەبی سیاسی و د. رێبوار ئیسماعیل ئەندامی سەرکردایەتی ئامادەبوون، دوایین گۆڕانكارییە سیاسییەكانی هەرێم گفتوگۆیان لەبارەوەكرا.


‌‎ پرسی هەڵبژاردن لە هەرێم و پەسەندکردنی پرۆژەیاسای بودجە تەوەرێکیتری گفتوگۆکان بوو و لەوبارەیەوە سەرۆك بافڵ جەلال تاڵەبانی رایگەیاند:"یەكێتی هێزێكی پابەندە بە پاراستنی پایەكانی دیموكراسی و لەگەڵ ئەنجامدانی هەڵبژاردنێكی بێگەردین، بەڵام لەچوارچێوەی یاسایەكی گونجاو كە دادپەروەریی تێدابێت و وەڵامدەرەوەی قۆناغەكە و خواستی هەموولایەك بێت".



‌‎لەبارەی بودجەی عیراق و هەوڵەکان بۆ چەسپاندنی دادپەروەری، سەرۆک بافڵ وتی:"هەموو هەوڵەكانمان لەسەر بنەمای یەكسانی و نەهێشتنی جیاكاری بوو، سەرباری ئەوەی وەڵامدەرەوەی سەرجەم خواستەكانی هەرێم نەبوو، بەڵام ئێستاش پێمانوایە جێبەجێكردنی یاساكە وەكخۆی ماف و شایستەداراییەكانی كورد دابیندەكات و چیتر ژیان و قووتی خەڵك شەڕی سیاسی پێوەناكرێت".



‌‎هەر لە دیدارەکەدا سەرۆک بافڵ بۆ کۆچی دوایی سێلڤیۆ بێرلسكۆنی، سەرۆک وەزیرانی پێشووتری ئیتاڵیا، پرسە و سەرەخۆشی گەیاندە کونسوڵ و گەلی ئیتاڵیا و هاوخەمی خۆی بۆ ئەم ماتەمە دەربڕی.

PUKMEDIA