قوباد تاڵه‌بانی كارگه‌یه‌كی گه‌وره‌ی شیره‌مه‌نی له‌ هه‌ڵه‌بجه‌ ده‌كاته‌وه‌

PUKMEDIA

سەردانی قوەباد تاڵەبانی بۆ کارگەی شیرەمەنی راسان

قوباد تاڵه‌بانی جێگری سه‌رۆك وه‌زیران ئه‌مڕ‌ۆ ١٨ی حوزه‌یرانی ٢٠٢٣ سه‌ردانی هه‌ڵه‌بجه‌ی كرد و له‌ سه‌ردانه‌كه‌یدا به‌ مه‌به‌ستی پشتگیریكردن له‌ پڕ‌ۆژه‌كانی وه‌به‌رهێنان، كۆمه‌ڵگه‌ی خۆراكی راسانی به‌سه‌ر كرده‌وه‌.

جێگری سه‌رۆك وه‌زیران له‌ سه‌ردانه‌كه‌یدا پشتگیری ته‌واوی خۆی بۆ وه‌به‌رهێنه‌رانی هه‌ڵه‌بجه‌ و كۆمه‌ڵگه‌ی خۆراكی راسان ده‌ربڕ‌ی و ئاماده‌یی خۆشی ده‌ربڕ‌ی كه‌ هه‌موو جۆره‌ كارئاسانییه‌ك بۆ پڕ‌ۆژه‌كانی وه‌به‌رهێنانی شاره‌كه‌ بكات.

قوباد تاڵه‌بانی داوای له‌ وه‌به‌رهێنه‌ران كرد كوالێتی به‌رهه‌مه‌كانیان پێویسته‌ به‌ جۆرێك بێت كه‌ نه‌ك هه‌ر بتوانن له‌ بازاڕ‌ه‌كانی ناوخۆی كوردستاندا ركه‌به‌ری به‌رهه‌مه‌ بیانییه‌كان بكه‌ن، به‌ڵكو ده‌بێت پلانی تۆكمه‌ دابنێن تا بتوانن به‌رهه‌مه‌كانیان له‌ بازاڕ‌ه‌كانی ناوه‌ڕ‌است و باشوری عیراق ساغ بكه‌نه‌وه‌، چونكه‌ گه‌وره‌ترین بازاڕ‌ی پیشه‌سازی خۆراكی كوردستان له‌ ساڵه‌كانی داهاتوودا ناوه‌ڕ‌است و باشوری عیراقه‌.

كارگه‌ی شیره‌مه‌نی راسان بڕ‌یاره‌ تا ساڵێكی دیكه‌ كاره‌كانی ته‌واو بكرێت و هه‌موو شیری ئاژه‌ڵدارانی ناوچه‌كه‌ بكڕ‌ێته‌وه‌ و به‌مه‌ش كه‌رتی ئاژه‌ڵداری له‌ ناوچه‌كه‌ گه‌شه‌یه‌كی گه‌وره‌ به‌خۆیه‌وه‌ ده‌بینێت. هه‌روه‌ها به‌ ته‌واوبوونی كارگه‌كه‌، نزیكه‌ی ١٠٠٠ هه‌لی كاری راسته‌وخۆ و ناڕ‌استه‌وخۆش بۆ دانیشتوانی هه‌ڵه‌بجه‌ و ده‌وروبه‌ری ده‌ڕ‌خسێنێت.
 
هه‌ر له‌ چوارچێوه‌ی سه‌ردانه‌كه‌یدا بۆ كۆمه‌ڵگای خۆراكی راسان، كارگه‌ی رۆنی زه‌یتونی راسانیشی به‌سه‌ر كرده‌وه‌ كه‌ ئه‌م كارگه‌یه‌ له‌ ساڵی ٢٠١٨وه‌ دامه‌زراوه‌ و به‌رهه‌مه‌كانی بۆ ناوچه‌كانی دیكه‌ی عێراق و ده‌ره‌وه‌ی وڵات هه‌نارده‌ ده‌كات. ئه‌م كارگه‌یه‌ جگه‌ له‌وه‌ی ژماره‌یه‌ك به‌رچاو هه‌لی كار ره‌خساندووه‌، كاریگه‌ریشی هه‌بووه‌ له‌سه‌ر سه‌وزتربوونی ژینگه‌ی هه‌ڵه‌بجه‌ و به‌هۆیه‌وه‌ ژماره‌ی دار زه‌یتونه‌كانی هه‌ڵه‌بجه‌ به‌ ڕ‌ێژه‌یه‌كی به‌رچاو زیادی كردوه‌ كه‌ ته‌نها له‌ماوه‌ی پێنج ساڵی رابردوودا ٥٠ هه‌زار دار زه‌یتوون روێندراوه‌.

كۆمه‌ڵگه‌ی خۆراكی راسان پڕ‌ۆژه‌یه‌كی گه‌وره‌ی پیشه‌سازی خۆراكه‌ له‌ هه‌ڵه‌بجه‌ و یه‌كێك له‌ پڕ‌ۆژه‌كانی ناو كۆمه‌ڵگه‌كه‌ كردنه‌وه‌ی كارگه‌یه‌كی گه‌وره‌ی شیره‌مه‌نییه‌ له‌ماوه‌ی یه‌ك ساڵدا كه‌ گه‌وره‌ترین كارگه‌یه‌ له‌سه‌ر ئاستی ناوچه‌كه‌دا.

PUKMEDIA