قوباد تاڵەبانی: جەژن بكەینە هۆكاری لێبوردەیی و ئاشتەوایی

نووسینگەی رۆژنامەوانی قوباد تاڵەبانی

قوباد تاڵەبانی

بەبۆنەی هاتنەوەی جەژنی قوربانی پیرۆزەوە، قوباد تاڵەبانی پەیامێكی پیرۆزبایی بڵاودەكاتەوە و رایدەگەیەنێت: "پێویستە ئیلهام لە جەژن وەرگرین بۆ لێبوردەیی و ئاشتەوایی و زاڵكردنی گیانی یەكتر قبووڵكردن و ئەوەی ئێمەی كورد پێی دەڵێن «گەردن ئازادی»".

دەقی پەیامەكە:

جەژنی قوربانی پیرۆز لە هەموو موسوڵمانانی جیهان و كوردستان بەتایبەت پیرۆز بێت. دڵمان لای حاجییانە پاش بەجێهێنانی ئەركەكانی حەج بە سەلامەتی بگەڕێنەوە بۆ ناو ئازیزانی خۆیان.

ئیسلام ئایین و شارستانییەتیشە و یەكێك لە جوانییەكانی كۆمەڵگای كوردی كە زۆرینەی ئەم باوەڕ و ڕێبازەی قبووڵ كردووە گیانە میانڕەوی و كراوەییەكەی بووە لەگەڵ ئایین و بیروباوەڕەكانی دیكە. جێگای داخی زۆرە بەم دواییانە پێچەوانەی ئەو رەوتە مێژووییە ئاییندارییەی وڵاتەكەمان، لێرە و لەوێ هەواڵ و رووداو و كارەساتی ناخۆش و نامۆ بەكۆمەڵگاكەمان بەئاگامان دەهێننەوە و پێمان دەڵێن كە پێویستە بە هەموومان و هەریەك لای خۆیەوە هۆكارەكانی لە بنەڕەتەوە چارەسەر بكەین.

پێویستە ئیلهام لە جەژن وەرگرین بۆ لێبوردەیی و ئاشتەوایی و زاڵكردنی گیانی یەكتر قبووڵكردن و ئەوەی ئێمەی كورد پێی دەڵێن «گەردن ئازادی».

جەژنی هەموو لایەك پیرۆز و حەجی حاجییان قبووڵ بێت و ساڵانی تر بە خۆشی و شادی زیاترەوە بگەڕێتەوە ناومان.

PUKMEDIA