سەرۆک بافڵ: جەژن بکەینە بنەمایەک بۆ تێپەڕاندنی ئاڵنگارییەکان

نوسینگەی رۆژنامەوانی سەرۆکی یەکێتی

پیرۆزبایی سەرۆک بافڵ

بافڵ جەلال تاڵەبانی سەرۆکی یەکێتیی نیشتمانیی کوردستان، بەبۆنەی هاتنەوەی جەژنی قوربانی پیرۆزەوە پەیامێکی بڵاوکردەوە و رایدەگەیەنێت، "جەژن بکەینە بنەمایەک بۆ تێپەڕاندنی ئاڵنگارییەکان و مژدەی یەکڕیزییەکی هەمیشەیی لە ناوخۆ و دەرەوە بە خەڵکە خۆشەویستەکەمان بدەین، کە ئەمەش تەنیا رێگەیە بۆ بەهێزترکردنی کوردستانەکەمان و پارێزگاریکردن لە بەرژەوەندییە نیشتمانی و نەتەوەییەکان".

دەقی پەیامەکەی سەرۆک بافڵ

جەژنی قوربانی پیرۆز لە موسڵمانانی کوردستان، عیراق و جیهان پیرۆزبێت.

هیوادارم ئەم جەژنە پیرۆزە ئاشتی و کامەرانی لەگەڵ خۆیدا بهێنێت و سەرەتایەک بێت بۆ کۆتاییهاتنی ناکۆکییەکان و دەستپێکی قۆناغێکی نوێی تەبایی و برایەتی بێت. پێكەوە لەچوارچێوەی كوردستانێكی فرەڕەنگ و دەوڵەمەند بە یەكترقبووڵكردن و رێزگرتن لەجیاوازییەكان، ژیانێكی ئارام و دوور لە توندوتیژی و توندڕەوی بەسەربەرین. نابێت رێگەبدەین بیری توندڕەوی جێگەی میانڕەوی بگرێتەوە و پێویستە كەلتووری خۆشەویستی و ژیاندۆستی بەسەر كۆمەڵگەكەماندا زاڵبكەین. لە رووە سیاسییەكەشەوە جەژن بکەینە بنەمایەک بۆ تێپەڕاندنی ئاڵنگارییەکان و مژدەی یەکڕیزییەکی هەمیشەیی لە ناوخۆ و دەرەوە بە خەڵکە خۆشەویستەکەمان بدەین، کە ئەمەش تەنیا رێگەیە بۆ بەهێزترکردنی کوردستانەکەمان و پارێزگاریکردن لە بەرژەوەندییە نیشتمانی و نەتەوەییەکان.

بافڵ جەلال تاڵەبانی
سەرۆکی یەکێتیی نیشتمانیی کوردستان