قوباد تاڵەبانی: لەگەڵ هەڵبژاردنی بێگەرد داین

PUKMEDIA

کۆبوونەوەی قوباد تاڵەبانی لەگەڵ مەکتەبی رێکخستنی (ی.ن.ک)

قوباد تاڵەبانی، لەکۆبوونەوەی لەگەڵ مەکتەبی رێکخستنی یەکێتیی نیشتمانیی کوردستاندا رایگەیاند، "یەکێتی پێگەیەکی گەورەی هەیە، بۆیە هەمیشە چاوەڕوانی باشتری لێدەکرێت و بۆ ئەو مەبەستەش خۆمان رێکدەخەینەوە و لەگەڵ بەڕێوەچوونی هەڵبژاردنێکی بێگەرد و دادپەروەرانەداین".

جێبەجێکاری  پلانەکانی سەرۆک بافڵ دەبین

لەکۆبوونەوەکەدا کە رۆژی ٢ی تەمموزی ٢٠٢٣ لە سلێمانی بەڕێوەچوو و سەرکەوت زەکی لێپرسراوی مەکتەبی رێکخستن ئامادەیبوو، قوباد تاڵەبانی سەرپەرشتیاری مەکتەبی سکرتارییەتی سەرۆک مام جەلال دوا گۆڕانکاریی و پێشهاتە سیاسییەکان و دۆخی ناوخۆی یەکێتی بۆ ئامادەبووان روونکردەوە.

سەرەتا سەرکەوت زەکی، تیشکی خستەسەر کارو چالاکییەکانی مەکتەبی رێکخستن و گرفتەکانی بەردەم کارەکانیان و ئاماژەی بەوەدا: "پلانیان داناوە و ئامادەکارییان کردووە بۆ چۆنییەتی خۆگونجاندن لەگەڵ ئەم قۆناغە نوێیە بە شێوازێک کە لە ئاستی چاوەڕوانیی کادری حزب و خەڵکی کوردستاندا بێت". "جەختیشیکردەوە جێبەجێکاری  پلان و سیاسەتەکانی سەرۆک بافڵ تاڵەبانی دەبین لەپێناو باشتر بەڕێوەبردنی یەکێتی".

قوباد تاڵەبانی: مەکتەبی رێکخستن دڵی حزبە

دواتر قوباد تاڵەبانی باسی دۆخی ناوخۆی یەکێتی کرد و رایگەیاند: "گۆڕانکاری دەکەین لە شێوازی کارکردن بە جۆرێک کە لەگەڵ ئەم دۆخەی ئێستادا گونجاو بێت و بۆ ئەو مەبەستەش پێویستیمان بە هەوڵ و هیمەتی هەموولایەکە". وتیشی: "مەکتەبی رێکخستن دڵی حزبە و کاریگەری گەورەی لەسەر ئۆرگانەکان و لەسەر جێبەجێکردنی سیاسەت و بەرنامەی کاری حزب هەیە".

قوباد تاڵەبانی ئاماژەی بەوەشدا: "یەکێتی سیاسەت و پرەنسیپەکانی نەگۆڕاوە و هەموو کات لەگەڵ عەدالەتی دارایی و پەیوەندییەکی تەندروست بووە لەگەڵ بەغدا". دوپاتیشیکردەوە: "یەکێتی داڕێژەری فیدرالییەتە لە عیراق و بنیاتنەر و پارێزەری قەوارەی هەرێم و دەستکەوتەکانییەتی، ئەمەش تاکە رێگەیە بۆ خزمەتکردنی هاوڵاتییان و زامنکردنی مافە دەستورییەکانی کۆمەڵانی خەڵکی کوردستان".

قوباد تاڵەبانی: لەگەڵ یەکڕیزی و تەبایی ناوخۆییداین

لەبارەی هەڵبژاردنیشەوە سەرپەرشتیاری مەکتەبی سکرتارییەتی سەرۆک مام جەلال وتی: "لەگەڵ ئەوەدا نەبووین هەڵبژاردن دوابکەوێت و ئێستاش ئامادەکاریی تەواومان کردووە و دەبێت هەڵبژاردن بکرێت، و ئێمە لەگەڵ بەڕێوەچوونی هەڵبژاردنێکی بێگەرد و دادپەروەرانەداین و مافی هەموو پێکهاتەکانیش پارێزراو بێت".

لەبارەی پەیوەندییەکانی یەکێتی لەگەڵ حزب و لایەنە سیاسییەکان، قوباد تاڵەبانی رایگەیاند: "ئێمە لەگەڵ یەکڕیزی و تەبایی ناوخۆییداین و هەموو کاتێک وتوومانە دەبێت پەیوەندی زۆر باشمان لەگەڵ لایەنەکان هەبێت، بەڵام ئەوە بەو مانایە نایەت کە سیاسەتی حزبەکان وەکیەک بێت، هەموو حزبێک سیاسەتی خۆی هەیە و کار لەسەر جێبەجێکردنی دەکات، یەکێتیش سیاسەتی تایبەتی خۆی هەیە و لەڕێی ئۆرگان و کادرەکانییەوە کار لەسەر جێبەجێکردنی دەکات".
PUKMEDIA