رێکخراوی پەیامنێران : سلێمانی ئارامترین شوێنە بۆ رۆژنامەنووسان

ئاژانسەکان

هۆزان قادر سەرۆکی رێکخراوی پەیامنێران

لەکۆنگرەیەکی رۆژنامەوانیدا رێکخراوی پەیامنێران ئاماری پێشێلکارییەکانی بەرامبەر بە رۆژنامەنووسان لە ٦ مانگی رابردوودا راگەیاند، بەپێی ئامارەکە سلێمانی ئارامترین شوێنی رۆژنامەنووسان بووە و کەمترین حاڵەتی پێشێلکاری تێدا تۆمارکراوە.

هۆزان قادر سەرۆکی رێکخراوی پەیامنێران لە کۆنگرەیەکی رۆژنامەوانیدا رایگەیاند:" بەپێی ئامارەکانی بەردەست رێکخراوی پەیامنێران، سەبارەت بەو پێشێلکارییانەی بەرامبەر بە رۆژنامەنووسان لەپاریزگاکانی هەرێمی کوردستان ئەنجامدراون، سلێمانی بۆ رۆژنامەنووسان  ئارامترین شاربووە و کەمترین حاڵەتی تێدا تۆمارکراوە،  دوای ئەویش هەڵەبجە دێت".

هەر لە کۆنگرەکەدا هۆزان قادر ئاماژەی بەوەکرد:" لە پاریزگای دهۆک زۆرترین پێشێلکاری بەرامبەر بە رۆژنامەنووسان ئەنجامدراوە و ٢٥ حاڵەت تۆمارکراوە، هاوکات لە هەولێر ١٦ حاڵەت تۆمارکراوە و لەهەڵەبجەش ٥  حاڵەت تۆمارکراوە، هەروەها سلێمانی ئارامترین شوێن بووە بۆ رۆژنامەنووسان و کەمترین حاڵەتی تێدا تۆماکراوە کە رێژەکەی ٤ حاڵەتە".

PUKMEDIA