قوباد تاڵەبانی هەوڵەكانی كونسوڵی فەڕەنسا بەرز دەنرخێنێت

نووسینگەی قوباد تاڵەبانی

قوباد تاڵەبانی جێگری سەرۆكوەزیران و ئۆلیڤیێ دیكۆتینی كونسوڵی گشتی فەڕەنسا

بە مەبەستی ماڵئاوایی كردن و كۆتاییهاتنی ئەركەكەی، ئۆلیڤیێ دیكۆتینی كونسوڵی گشتی فەڕەنسا، سەردانی قوباد تاڵەبانی، جێگری سەرۆك وەزیرانی كرد و  لە كۆبوونەوەی نێوانیاندا قوباد تاڵەبانی هەوڵەكانی كونسوڵی فەڕەنسای بەرزنرخاند لە بەهێزتر كردنی پەیوەندییەكانی نێوان فەڕەنسا و هەرێمی كوردستان.

لە كۆبوونەوەكەدا كە رۆژی 5-7-2023، لە هەولێر بەڕێوەچوو، بەبۆنەی ماڵئاوایی و كۆتاییهاتنی ئەركی كونسوڵی گشتیی فەڕەنسا لە هەرێم، قوباد تاڵەبانی ستایشی ئۆلیڤیێ دیكۆتینی كرد لەپای پەیوەندییە كۆمەڵایەتییەكانی لە هەموو شارەكانی هەرێم و لە پەرەپێدانی زیاتری پەیوەندیی دێرینی كورد و فەڕەنسا و هیوای سەركەوتنی بۆ خواست لە ئەركی داهاتوویدا.

كونسوڵی فەڕەنسا خۆشحاڵی خۆی دەربڕی كە لە هەرێمی كوردستان ئەو ئەركەی پێ سپێردرابوو و پابەندی وڵاتەكەشی لە پشتیوانیكردنی هەرێمی كوردستان دووپات كردەوە و و رۆڵی جێگری سەرۆك وەزیرانیشی بەرز نرخاند لە ئەنجامدانی چاكسازی لە سێكتەرە جیاجیاكاندا بە ئاراستەی باشتركردنی پرۆسەی حوكمڕانی لە كوردستان.

 دواتر تیشك خرایە سەر دواپێشهات و گۆڕانكارییەكانی هەرێمی كوردستان و لە كۆتایی كۆبوونەوەكەشدا قوباد تاڵەبانی كتێبێكی لەبارەی مێژووی كوردستانەوە وەك دیاری ماڵئاوایی پێشكەشی كونسوڵی گشتیی فەڕەنسا كرد.

PUKMEDIA