یەكەم تووشبووی تای خوێنبەربوون لە سلێمانی چارەسەركرا

بەڕێوەبەرایەتی تەندروستی سلێمانی

یەكەم تووشبووی تای خوێنبەربوون لە سلێمانی چارەسەركرا

یەكەم تووشبووی تای خوێنبەربوون لە پارێزگای سلێمانی پاش 10 رۆژ لە وەرگرتنی چارەسەر نەخۆشخانەی جێهێشت و گەڕایەوە ماڵەوە.

سامان شێخ لەتیف وتەبێژی بەڕێوەبەرایەتی تەندروستی سلێمانی لە لێدوانێكیدا بۆ سایتی رەسمی یەكێتیی نیشتمانیی كوردستان PUKMEDIA رایگەیاند: "ئەو هاووڵاتییەی هەفتەی رابردوو وەك یەكەم توشبووی تای خوێن بەربوون لەپارێزگای سلێمانی راگەیەندرا، لەدوای وەرگرتنی چارەسەر لەنەخۆشخانە چاك بووەوە و رەوانەی ماڵەوە كرایەوە".

"چاكبوونەوەی یەكەم توشبووی تای خوێنبەربوون لە پارێزگای سلێمانی دەستكەوتێكی گەورەیە بۆ تەندروستی سلێمانی، بەهەوڵی پسپۆڕەكانمان توانیمان لەڕێی ئەو چارەسەرانەی بۆ توشبووەكە كرا لەماوەیەكی كەمدا توشبووەكە خوێنبەربوونەكەی بوەستێنین و بە تەندروستییەكی باشەوە رەوانەی ماڵەوەی بكەینەوە" وتەبێژی تەندروستی سلێمانی وادەڵێت.

یەكەم توشبووی تای خوێن بەربوون لەپارێزگاری سلێمانی، ژنێكی تەمەن 45 ساڵی خەڵكی شارۆچكەی چوارقوڕنە بوو، لەدوای وەرگرتنی چارەسەر و باشبوونی باری تەندروستی، ئەمڕۆ 13-7-2023، لەلایەن بەڕێوەبەر و پزیشك و ستافی نەخۆشخانەی شار بەچەپكەگوڵەوە ماڵئاوایی لێكرا و رەوانەی ماڵەوە كرایەوە.

PUKMEDIA