سەرۆک کۆمار: کاری جددی بۆ جێبەجێکردنی ماددەی 140 بکرێت

PUKMEDIA

سەرۆک کۆماری عیراق

سەرۆک کۆماری عیراق داوادەکات کاری جدی بکرێت بۆ جێبەجێکردنی ماددەی 140ی دەستوور و کۆتاییهێنان بە کێشە هەڵپەسێردراوەکان بە شێوەیەک کە مافی هەمووان بپارێزێت.

د. لەتیف جەمال رەشید سەرۆک کۆماری عیراق، جەختیکردەوە لە گرنگی بەدواداچوونکردن بۆ جێبەجێکردنی بڕیارەکانی لیژنەی باڵای جێبەجێکردنی ماددەی 140 بە سازکردنی کۆبوونەوە و دیدار لەگەڵ لایەنە پەیوەندیدارەکان و پێدانی پێشینە بۆ ئەم دۆسیەیە، کە کاریگەری لەسەر ژیانی بەشێکی فراوان لە پێکهاتەکانی کۆمەڵگەی عیراقی هەیە.

سەرۆک کۆمار پێشتر لەگەڵ وەفدێک کۆبووەوە کە پێکهاتبوو لە ژمارەیەک جوتیارانی پارێزگای کەرکوک و ئەندامی لیژنەی باڵای جێبەجێکردنی ماددەی 140، بابەکر سدیق ئەحمەد بەجیا و گوێی لەو ئاستەنگانە گرت کە رووبەڕوویان دەبنەوە، بەتایبەتی لە چارەسەرکردنی کێشەکانی پەیوەست بە زەوی کشتوکاڵی و کارانەکردنی ماددەی 140، کە تێیدا وەفدەکە دوای کۆبوونەوە لەگەڵ سەرۆک کۆمار، ژمارەیەک کۆبوونەوەیان لەگەڵ بەرپرسان و لایەنە پەیوەندیدارەکان سازکرد، کە لە ئەنجامدا هەنگاوی ڕاستەقینەیان گرتە بەر بۆ جێبەجێکردنی بڕیاری ئەنجومەنی وەزیران ژمارە 29 لەساڵی 2012 به مەبەستی دۆزینەوەی چارەسەری گونجاو بۆ گرفتەکانی جوتیارانی کەرکوک .

هەروەها سەرۆک کۆمار رێنوێنی پێکهێنانی لیژنەیەکی لە سەرۆکایەتی کۆمار کرد بۆ بەدواداچوونکردن بۆ جێبەجێکردنی بڕیارەکانی لیژنەی باڵای ماددەی 140 لەلایەن وەزارەت و دامەزراوە پەیوەندیدارەکانەوە و پێشکەشکردنی راپۆرتی مانگانە بۆ بەڕێزیان لەم بارەیەوە.
PUKMEDIA