رێكخراوی سی پی تی: حزب بۆ سه‌ركوتكردن دادگاكان به‌كارده‌هێنێت

PUKMEDIA

رێکخراوی سی پی تی

كه‌یسی شێروان شێروانی و ده‌ستگیركراوانی بادینان تیمی كوردستانی عیراقی رێكخراوی سی پی تی هێنایه‌ ده‌نگ و رایانگه‌یاند:"سیستمی دادوه‌ری له‌هه‌رێمی كوردستان سه‌ربه‌خۆ نییه‌و به‌ته‌واوه‌تی شكستی هێناوه‌و حزب به‌ڕێوه‌یده‌بات و به‌كارده‌هێنرێت بۆ سه‌ركوتكردنی ئازادی رۆژنامه‌گه‌ری".

سه‌رۆكی تیمی كوردستانی عیراقی رێكخراوی تیمه‌كانی ئاشتیخوازی كۆمه‌ڵگا، سی پی تی، له‌باره‌ی كه‌یسی رۆژنامه‌نوس و چالاكوان شێروان شێروانی له‌ كۆنگره‌یه‌كی رۆژنامه‌وانیدا رایگه‌یاند: "چوار ساڵ زیندانی بۆ شێروانی ئه‌وه‌ی ئێمه‌ چاودێریمان كرد سزادانێكی زۆر نادادپه‌روه‌ری بوو، هه‌موو ئه‌وبه‌ڵگانه‌ی ئاماده‌ی دانیشتنه‌كه‌ی دادگا بوون له‌به‌رژه‌وه‌ندی شێروان شێروانی بوون و هه‌روه‌ها  شاهیده‌كان وتیان ئێمه‌ ده‌سه‌ڵاتمان داوه‌ته‌ شێروان شێروانی له‌بری ئه‌وان ئیمزا بكات و له‌وه‌ڵامی پرسیاری دادوه‌ریشدا شایه‌ته‌كان وتیان كه‌به‌هۆی ئیمزاكه‌ی شێروان شێروانی هیچ زیانێكیان به‌رنه‌كه‌وتووه‌".

"نوێنه‌ری چاكسازی گه‌ورانی هه‌ولێر ئاماژه‌یان به‌وه‌ كرد كه‌ناو و ناوبانگیان له‌كه‌دار بووه‌، به‌ڵام پرسیاره‌كه‌ ئه‌وه‌یه‌ كاتێك دۆكیۆمێنتێك ته‌نها بۆ ناوه‌وه‌ی زیندان بووه‌ چۆن ده‌چێته‌ ده‌ره‌وه‌و ناو و ناوبانگ له‌كه‌دار ده‌كات"، سه‌رۆكی تیمی رێكخراوه‌كه‌ له‌كوردستانی عیراق وای وت.

ئاماژه‌ی بۆ ئه‌وه‌شكرد: "ئێمه‌ له‌ دۆخی زیندانیان و ته‌ندروستییان نیگه‌رانین و هیچ مافێكیان نییه‌ و ئه‌شكه‌نجه‌ ده‌درێن، ئه‌وه‌ی بینیمان ئه‌وه‌یه‌ سیستمی دادوه‌ری له‌هه‌رێمی كوردستان سه‌ربه‌خۆ نییه‌ و به‌ته‌واوه‌تی شكستی هێناوه‌و حزب به‌ڕێوه‌یده‌بات و به‌كارده‌هێنرێت بۆ سه‌ركوتكردنی ئازادی رۆژنامه‌گه‌ری، ئه‌وه‌شی رویدا ئاماژه‌یه‌ بۆ ئه‌وه‌ی حزب له‌م وڵاته‌ ده‌توانێت به‌بێ هیچ بڕ‌یارێكی دادگا خه‌ڵك ده‌ستگیر بكات و بیڕفێنێت ".

هه‌ر له‌كۆنگره‌كه‌دا سه‌رۆكی تیمی كوردستانی عیراقی رێكخراوی تیمه‌كانی ئاشتیخوازی كۆمه‌ڵگا، سی پی تی وتیشی: "شێروان شێروانی و سه‌رجه‌م رۆژنامه‌وانان و چالاكوانان به‌ ئامانج گیراون ، هه‌رێمی كوردستان شوێنێكی سه‌لامه‌ت نییه‌ بۆ رۆژنامه‌نوسان، بۆیه‌ داوای ئازادكردنی شێروان و ته‌واوی ده‌ستگیركراوان و زیندانیانی بادینان ده‌كه‌ین و داوا له‌ په‌رله‌مانتاران و قونسوڵخانه‌كان و چالاكوانان ده‌كه‌ین یه‌ك ده‌نگ بن بۆ ئه‌م كه‌یسه‌، له‌پێناو پاراستنی مافی ئازادی راده‌ربڕ‌ین".

PUKMEDIA