ئەندامێكی لیژنەی دارایی: بودجە بەهای دۆلار دادەبەزێنێت

PUKMEDIA

د. نەرمین مەعروف

چاوەڕواندەكرێت لە رۆژانی ئایندەدا بەهای دۆلاری ئەمریكی بەرامبەر بە دیناری عیراقی دابەزینی بەرچاو بەخۆیەوە ببینێت، ئەندامێكی لیژنەی دارایی لە ئەنجومەنی نوێنەرانیش دەڵێت: "هیچ هۆكارێكی رەسمی بۆ بەرزبوونەوەی بەهای دۆلار نییە بەڵكو ئەوەی كە هەیە تەنها كەمی خستنەڕووی دۆلار و پڕوپاگەندەی بازاڕە".

د. نەرمین مەعروف ئەندامی لیژنەی دارایی لە ئەنجومەنی نوێنەرانی عیراق لە لێدوانێكیدا بۆ سایتی رەسمی یەكێتیی نیشتمانیی كوردستان PUKMEDIA رایگەیاند: "كەمی خستنەڕووی دۆلار لەلایەن بانكی مەركەزییەوە و ئەو پڕوپاگەندانەی لەبازاڕ و تۆڕە كۆمەڵایەتییەكاندا هەن كاریگەری هەیە لەسەر دابەزینی بەهای دیناری عیراقی و نرخی دۆلاری ئەمریكی بەرز كردووەتەوە، بەڵام دواجار بڕیارێكی رەسمی بۆ بەرزكردنەوەی نرخی دۆلار نییە و لە ئایندەیەكی نزیكدا دۆلار تا رادەیەك دابەزین بەخۆیەوە دەبینێت".

"حكومەتی عیراق ناچارە ئەو دۆلارەی لە پارەی نەوت دەستیكەوتووە بیگۆڕێتەوە بە دینار، بۆ ئەوەی مووچە و پڕۆژەكانی پێ جێبەجێ بكات، ئەمەش وادەكات خستنەڕووی دۆلار لە بازاڕدا زۆربێت و نرخەكەی دابەزێت" د. نەرمین مەعروف وادەڵێت.

ئەندامەكەی لیژنەی دارایی راشیگەیاند: "جێبەجێكردنی رێكارەكانی بودجە جارێكی دیكە كاریگەری لەسەر دابەزینی بەهای دۆلار دەبێت، چونكە لە یاسای بودجەدا یەك دۆلار بە هەزار و 300 دینار، واتا نرخی 100 دۆلار بە 130 هەزار دینار جێگیر كراوە".

ئەمەش لە كاتێكدایە ماوەی چەند رۆژی رابردوودا بەهای دیناری عیراقی بەرامبەر بە دۆلاری ئەمریكی ناجێگیری بەخۆیەوە بینیوە، بەشێوەیەك بەهای 100 دۆلار بەرامبەر بە 158 هەزار دینار بوو، بەڵام لە ئەمڕۆدا نرخی 100 دۆلاری ئەمریكی بەرامبەر 153هەزار دیناری عیراقییە.

PUKMEDIA